ԵՐԵՎԱՆ, 4 սեպտեմբերի — Sputnik. Sputnik միջազգային տեղեկատվական գործակալությունն ու ռադիոն հայտարարում է Sputnik երիտասարդ լրագրողի դպրոցի հերթական մեկնարկի մասին, որը կտևի մինչև սեպտեմբերի 7-ը։
Դպրոցի սեպտեմբերյան շրջանին կմասնակցեն ԱՊՀ-ի, Բալթյան երկրների և Վրաստանի երիտասարդ լրագրողները։ Մասնակցում են ավելի քան 20 ԶԼՄ-ների ներկայացուցիչներ, որոնց թվում են նաև APA տեղեկատվական գործակալությունը (Ադրբեջան), Կազինֆորմը (Ղազախստան), Մեդիամաքսը (Հայաստան), Օզոդագոնը (Տաջիկստան), Uzbekistan Today (Ուզբեկստան), Ղրղըզստանի Հանրապետության հանրային հեռուստառադիոհեռարձակող կորպորացիան, Բելտելեռադիո ընկերությունը (Բելառուս), Հայաստանի հանրային հեռուստաընկերությունը։
Միջոցառումների շրջանակում մասնակիցները կծանոթանան ժամանակակից մուլտիմեդիոն գործակալության աշխատանքին, առցանց ԶԼՄ-ների համար նորությունների կոնտենտ ստեղծելու առանձնահատկություններին, ինչպես նաև նյութերի SMM առաջխաղացման յուրահատկությանը։ Ուշադրություն կհատկացվի գործնական պարապմունքներին, վարպետության դասերի ընթացքում երիտասարդ լրագրողները` փորձառու մասնագետների ղեկավարությամբ, կքննարկեն ժամանակակից մեդիայի առաջ ծառացած տարբեր խնդիրների լուծման տարբերակները։
«Մենք հույս ունենք, որ Դպրոցը հարթակ կդառնա մերձավոր երկրների լրագրողների արհեստավարժ երկխոսության համար։ Հետաքրքիր ու օգտակար կլինի պատմել մեր գործակալության աշխատանքի մասին, միաժամանակ ծանոթանալ մեր գործընկերների աշխատաոճին»,- ասաց Sputnik միջազգային տեղեկատվական գործակալությունն ու ռադիոյի գլխավոր խմբագրի տեղակալ Անդրեյ Բլագոդիրենկոն։
Sputnik երիտասարդ լրագրողի դպրոցը կազմակերպվում է Անկախ պետությունների համագործակցության հարցերով դաշնային գործակալության «Նոր սերունդ» ծրագրի շրջանակում։ 2015 թվականից ի վեր ավելի քան 100 լրագրող մասնակցել է մեդիաոլորտում ունեցած փորձի փոխանակման այս ինքնատիպ նախագծին։
Sputnik-ը միջազգային տեղեկատվական գործակալություն է և ռադիո։ Մուլտիմեդիոն տեղեկատվական մասնաճյուղեր ունի տասնյակ երկրներում, կայքեր` ավելի քան 30 լեզվով, անալոգային և թվային ռադիոհեռարձակում, բջջային հավելվածներ և էջեր սոցցանցերում։ Sputnik-ի լուրերը շուրջօրյա ռեժիմով թողարկվում են անգլերեն, արաբերեն, իսպաներեն և չինարեն լեզուներով:
