ԵՐԵՎԱՆ, 6 սեպտեմբերի — Sputnik. Ոստիկանությունն ահազանգ է ստացել, որ Ախուրյան գյուղում դժբախտ պատահար է տեղի ունեցել։ 16 տարեկան տղաներն իրար հետ կատակել են, նրանցից մեկը բենզինը լցրել է ընկերոջ վրա, հետո կրակայրիչը վառել։ Անմիջապես կրակ է բռնկել։ Այրվածքներ ստացած տղային տեղափոխել են Երևան` Ճառագայթային բժշկության և այրվածքների հանրապետական կենտրոն։
Sputnik Արմենիային բուժհաստատության վերակենդանացման բաժանմունքի հերթապահ բժիշկը միայն հայտնեց, որ տղայի վիճակը կայուն ծանր է։
Իսկ ՀՀ քննչական կոմիտեի նախագահի խորհրդական Սոնա Տռուզյանը տեղեկացրեց, որ ահազանգը ստացել են «Գյումրի» բժշկական կենտրոնից։ Տղայի մոտ կա դեմքի, վերին վերջույթների, որովայնի առաջնային շրջանների այրվածք։
«Նախնական տվյալների համաձայն` տղան այրվածքներ ստացել է ընկերոջ հետ կատակելիս։ Այժմ քննություն է տարվում նախնական տվյալները ստուգելու ուղղությամբ»։
Տռուզյանը հայտնեց նաև` տուժած տղան ի վիճակի չէ ցուցմունք տալ։
