ԵՐԵՎԱՆ, 6 սեպտեմբերի — Sputnik. Հայաստանն ինքնիշխան պետություն է, որի քաղաքականությունը բխում է սեփական շահերից, Sputnik Արմենիային ասաց ՀԱՊԿ մամուլի քարտուղար Վլադիմիր Զայնեթդինովը` մեկնաբանելով ՆԱՏՕ-Հայաստան համագործակցությունը։
«Ինչ վերաբերում է ՆԱՏՕ-ի` Վրաստանում անցկացվող զորավարժություններին ՀՀ ԶՈՒ ստորաբաժանումների չմասնակցելուն, ապա դա բացառապես երկրի իրավունքն է։ Սակայն այդ զորավարժություններին հայ զինծառայողների պաշտոնական մասնակցության մասին որևէ տեղ նշված չի եղել։ Հայաստանի Հանրապետությունը ինքնիշխան պետություն է, որի արտաքին և ռազմական քաղաքականությունը բխում է սեփական շահերից, և ՀԱՊԿ-ում չեն մեկնաբանում Հայաստանի ղեկավարության ընդունած որոշումները», — ասաց Զայնեթդինովը։
Նրա խոսքով` Հայաստանը ՀԱՊԿ-ի ամենաակտիվ պետություններից է, որի տարածքում պարբերաբար անցկացվում են ՀԱՊԿ հավաքական ուժերի զորավարժությունները։
2017 թվականին Օպերատիվ արձագանքման հավաքական ուժերի հետ համատեղ կանցկացվեն «Փոխգործակցություն-2017» զորավարժությունները, անցյալ տարի Հայաստանը նախագահում էր ՀԱՊԿ-ում և ամենաբարձր մակարդակով անցկացրեց ՀԱՊԿ գագաթնաժողովն ու Կազմակերպության օրենսդիր մարմինների նիստերը։
ՀԱՊԿ ձևաչափում իրականացվում են Հայաստանի նախաձեռնությունները, որոնք ուղղված են հավաքական անվտանգության ամրապնդմանը։
Հայ զինծառայողները չեն մասնակցել Օրպոլո զորավարժարանում կիրակի մեկնարկած Agile Spirit 2017 բազմազգ զորավարժություններին։ ՀՀ ՊՆ-ում հայտնել են, որ Երևանի որոշման մեջ «արտառոց ոչինչ չկա» և «Հայաստանն ինքնիշխան որոշում է կայացրել»։
