Աննա Վարդանյան, Sputnik
Ընդդիմադիր որոշ ուժեր դուրս մղվեցին, որոշները, նույնիսկ, ժամանակավրեպ են: Հները գնացին, նորերն էլ չկան, որ իրավիճակ թելադրեն: Իսկ իշխանական դաշտում իրավիճակը կակտիվացնեն հենց խորհրդարանական տարվա մեկնարկով: Կսկսեն վարչապետի իրենց թեկնածուի լոբինգն անել: Իսկ վարչապետն, ամեն դեպքում, հայտնի անհայտն է լինելու:
Սեպտեմբերի 13-ին լրանում է Կարեն Կարապետյանի վարչապետության մեկ տարին: Քաղտեխնոլոգ Վիգեն Հակոբյանի գնահատմամբ՝ անցող տարին բավականին բարդ ժամանակաշրջան էր Կարեն Կարապետյանի համար: Այն նախընտրական էր, իսկ, որպես կանոն, այն միշտ համարվում է ոչ բարենպաստ տնտեսության համար: Դրանով հանդերձ, կառավարության ղեկավարը բավականին զգուշավոր օպտիմիզմով սկսեց իր գործունեությունը: Նա չէր ընկալվում որպես համակարգի մարդ, ինչքան էլ որ նախընտրական շրջանում նրան հատուկ կարգավիճակով ՀՀԿ-ին անդամագրեցին: Վիգեն Հակոբյանի խոսքով՝ իր գործունեության առաջին տարին Կարապետյանն, ըստ էության, վարվեց այնպես, ինչպես և բնորոշել էր՝ զբաղվեց գույքագրմամբ, սանիտարական մաքրմամբ և որոշակի հիմքերի ձևավորմամբ:
Չնայած՝ այս տարվա առաջին կիսամյակում արձանագրված տնտեսական աճն այն չէ, ինչն իր մաշկի վրա կզգա յուրաքանչյուր քաղաքացի, այդուհանդերձ, Կարապետյանը և իր ձևավորած կառավարությունը տնտեսության աշխուժացման առումով որոշակի քայլեր արել են: Դրական տեղաշարժեր կան, հատկապես, տուրիզմի, հարկային ու մաքսային ոլորտներում: Պարզեցվել են նաև գնումների ընթացակարգերը, քայլեր են ձեռնարկվել հակակոռուպցիոն մեխանիզմների մշակման ուղղությամբ: Վարչապետի գործունեության, թերևս, ամենանկատելի քայլը պետական համակարգում մենթալիտետային փոփոխություններն են:
«Կառավարման ոլորտում, հատկապես՝ մարզերում, տեղի իշխանիկների համար դրվել է քաղաքակրթության բարձրացման նշաձողը»,- նկատում է քաղտեխնոլոգը:
Հաշվի առնելով, որ յուրաքանչյուր իշխանության պարագայում վարչապետի ֆիգուրը ամենազոհաբերվողն է, կարելի է ասել, որ ներկա կառավարութան և այն ձևավորողի ռեյտինգը կամ վստահությունը բավականին բարձր է՝ 60- 70 տոկոս: Ըստ բանախոսի՝ գուցե դա պայմանավորված է նաև նրանով, որ այլընտրանք չեն տեսնում կամ ոչ ցանկալի են համարվում:
Քաղաքական օրակարգի առանցքայիններից է Սերժ Սարգսյանի նախագահության ավարտը և նոր պաշտոն ստանձնելու հարցը: Ո՞վ կլինի 2018-ին կառավարության ղեկավարը: Սերժ Սարգսյանն իր դոմինատությունը կշարունակի կառավարության ղեկավարի դերում թե, այդուհանդերձ, Կարեն Կարապետյանը կլինի կառավարության ղեկին, իսկ ներկա նախագահը կշարունակել ղեկավարել երկիրը, բայց՝ ՀՀԿ նախագահի պաշտոնում:
«Ամեն ինչ կորոշի ՀՀԿ-ն: Այդ կուսակցության նախագահը Սերժ Սարգսյան է։ Անկախ նրանից, թե նա 2018-ի ապրիլից հետո ինչ պաշտոն է զբաղեցնելու, միևնույն է, դժվար, թե նա չմնա ՀՀԿ նախագահ: Այսինքն՝ կուսակցությունում, որը որոշելու է այդ հարցը, Սերժ Սարգսյանն է լինելու այդ կուսակցության փաստացի և դեյուրե լիդերը: Ինչ վերաբերում է՝ նա՞ է լինելու հաջորդ վարչապետի թեկնածուն, ասեմ, որ տեսականորեն հնարավոր է, քանի որ, իրոք, նման հնարավորություններ կան»,- ասաց Հակոբյանը։
Ըստ բանախոսի՝ այս Սահմանադրությամբ վարչապետը բավականին խոցելի ֆիգուր է, նրան կարողանում են հանել ցանկացած պահի, եթե ինչ-որ բան փոխվի կուսակցությունում կամ, ասենք, ուժերի հարաբերակցությունում, նա առաջնային մանդատով ընտրվող մարդ չէ:
Վիգեն Հակոբյանի կարծիքով՝ կա դերերի հստակ տարաբաշխում: Սերժ Սարգսյանը զբաղվում է ներքին և արտաքին քաղաքական ու ուժային համակարգերի համակարգման հարցերով, վարչապետն էլ, այսօրվա դրությամբ, շեշտակիորեն զբաղվում է տնտեսության հարցերով՝ փորձելով առանձնապես չխառնվել քաղաքական հարցերին: Եվ սա ընդգծված դերերի բաժանում է:
«Չեմ բացառում, որ 2018-ի ապրիլից հետո դերերի նույն բաշխվածությունը կմնա»,- նշեց Վիգեն Հակոբյանը։
