ԵՐԵՎԱՆ, 7 սեպտեմբերի — Sputnik. 24-ամյա Ալինա Մինասյանի և 12-ամյա Անուշիկ Մալխասյանի վիճակը շարունակում է մնալ ծայրահեղ ծանր ու ծանր։ Այս պահի դրությամբ աղջկան արդեն երրորդ անգամն են վիրահատում, Sputnik Արմենիայի հետ զրույցում ասաց «Միրիան սուրբ թագավորի և Նանա թագուհու անվան Մցխեթայի բժշկական կենտրոն» կլինիկայի ամբուլատորիայի բաժնի վարիչ Թեա Կվարացխելիան։
«Անուշիկ Մալխասյանին այս պահին երրորդ անգամ են վիրահատում։ Նրա վիճակը շարունակում է կայուն ծանր մնալ։ Ալինա Մինասյանի վիճակը ծանր է։ Նրան հիվանդանոց էին տեղափոխել գլխուղեղի արյան զեղումով»,– ասաց Կվարացխելիան։
Նրա խոսքով` վաղ է որևէ կանխատեսում անել, սակայն նրանք անում են հնարավոր ամեն բան հիվանդներին ոտքի կանգնեցնելու համար։ Եվս մեկ տուժածի՝ 36-ամյա Ռոման Հայրապետյանի, ճակատագիրը դեռ պարզ չէ, քանի որ տվյալ բուժհաստատությունում տեղյակ չեն, թե նա որ կլինիկայում է գտնվում։
Հայաստանից Ռուսաստան մեկնող հայկական պետհամարանիշներով ավտոբուսի՝ Վրաստանում տեղի ունեցած խոշոր ավտովթարի հետևանքով 43-ամյա Լուսինե Մինասյանը, որը գտնվում էր Mercedes մակնիշի ավտոմեքենայի ղեկին, և 7-ամյա Մաքսիմ Մինասյանը տեղում զոհվել են։ Միջադեպը տեղի է ունեցել ժամը 03.39–ին Մցխեթա քաղաքի մերձակայքում։ Նախնական տվյալների համաձայն բախվել են Mercedes մակնիշի մարդատար ավտոմեքենան և Երևանից Մոսկվա ընթացող ուղևորատար ավտոբուսը։
Ավտոբուսը գրանցված է եղել Երևանում բնակվող Գոռ Թադևոսյանի անունով։
