ԵՐԵՎԱՆ, 7 սեպտեմբերի — Sputnik. Սեպտեմբերի 7-ին Մոսկվայի շրջանային դատարանը 12 տարվա ազատազրկման է դատապարտել հայազգի գործարար Արամ Պետրոսյանին, որն անցյալ տարի Մոսկվայի կենտրոնում գտնվող «Սիթիբանկի» մասնաճյուղում պատանդներ էր վերցրել:
«Դատարանը Պետրոսյանին մեղավոր է ճանաչել ՌԴ ՔՕ 206-րդ հոդվածի 2-րդ մասով («Որպես զենք կիրառվող առարկայի օգտագործմամբ 2 և ավելի անձանց պատանդ վերցնելը») և 205-րդ հոդվածի 1-ին մասով («Ահաբեկչություն») և նրան դատապարտել 12 տարվա ազատազրկման խիստ ռեժիմի գաղութում, այսինքն՝ 2016 թվականի օգոստոսի 24-ից հաշված: Տուժողի 50 հազար ռուբլու քաղաքացիական հայցը ամբողջությամբ բավարարել»,- դատավճիռը հրապարակել է դատավորը: Այս մասին հայտնում է ՌԻԱ Նովոստին:
Սրանից բացի, դատարանը Պետրոսյանին դատապարտել է մեկ տարի ժամկետով ազատության սահմանափակմամբ՝ պատիժը կրելուց հետո նա առանց հատուկ պետական մարմնի թույլտվության չի կարող Մոսկվայի մարզի սահմաններից դուրս գալ և բնակավայրը փոխել:
Պետրոսյանը կալանավորվել է դատարանի դահլիճում: Նիստերի դահլիճից դուրս գալիս նա բղավել է. «Ինձ պատմությունը կարդարացնի»:
Արամ Պետրոսյանն իրեն մեղավոր է ճանաչել պատանդներ վերցնելու համար, բայց խնդրել է իրեն արդարացնել ահաբեկչության հոդվածով:
Հիշեցնենք, որ Պետրոսյանը չորս պատանդ էր վերցրել «Սիթիբանկի» Մոսկվայի կենտրոնում գտնվող բաժանմունքում` սպառնալով պայթեցնել այն: Սակայն հետագայում տղամարդը բաց էր թողել բոլոր պատանդներին և հանձնվել էր իրավապահներին: Առարկան, որը նա որպես ռումբ էր ներկայացրել, կեղծ էր եղել: Հարցաքննության ընթացքում Պետրոսյանը հայտնել էր, որ ցանկանում էր իր արարքով ուշադրություն հրավիրել սնանկացումների խնդրին:
