ԵՐԵՎԱՆ, 10 սեպտեմբերի — Sputnik. Ֆրանսիայի հյուսիսում գտնվող Նայոն երկաթուղային կայարանում արձակված կրակոցների զոհ են դարձել 4 մարդ, որոնց թվում երեք և հինգ տարեկան երկու երեխա։ Այս մասին հայտնում է Le Parisien-ը։
«Անհայտ անձինք կրակ են բացել և չորս մարդ սպանել»,- հայտնում է պարբերականը։
Երկու երեխաներից ու նրանց մորից բացի, ըստ նախնական տվյալների, զոհվել է նաև նրանց ընտանիքի բարեկամը, որը փորձել է օգնել կնոջն ու երեխաներին հեռանալ քաղաքից։
Կրակողներից մեկն ինքնասպան է եղել, երկրորդը կարողացել է փախչել։ Այժմ նրա նկատմամբ հետախուզություն է հայտարարվել։
Դեպքի վայրը շղթայել են զինված ժանդարմները։ Կայարանի վերևում ուղղաթիռ է պտտվում։
