ԵՐԵՎԱՆ, 11 սեպտեմբերի – Sputnik. Այս օրն ահաբեկչությունից հետո մետրոնոմի հարվածների ներքո Մանհեթենում կառուցված հուշահամալիրում մեկ առ մեկ ընթերցվում են բոլոր զոհերի անունները:
Sputnik Արմենիայի հետ զրույցում արաբագետ Սարգիս Գրիգորյանը ընդգծում է, որ սեպտեմբերի 11-ից հետո ստեղծվել են ահաբեկչության դեմ պայքարի տարբեր կոմիտեներ ու կառույցներ, ահաբեկչության դեմ պայքարի համաշխարհային կոալիցիան, բայց նրանք բոլորը պայքարը ծավալում են անհատների ու կառույցների դեմ:
«Հիմա մենք գործ ունենք գլոբալ իսլամական ծայրահեղ արմատական շարժման հետ, որի դեմ նման մոտեցումներով պայքարելն արդյունավետ չէ, ինչքան էլ վերացնենք նրանց առաջնորդներին: Պայքարը պետք է իրականացվի համապատասխան քայլերի ու ծրագրերի միջոցով: Հակառակ դեպքում արդյունք չենք ունենա», համոզված է Սարգիս Գրիգորյանը: Արաբագետի խոսքով`այսօր մենք գործ ունենք նոր իրողությունների հետ՝ իսլամական ծայրահեղ արմատական տիրույթում, նոր իրողություններ, որի համար պետք են լուրջ մտածված ու հետևողական քայլեր, ինչին աշխարհը, մեծ հաշվով, պատրաստ չէ: Հակառակ դեպքում, ըստ բանախոսի, չէինք ունենա ահաբեկչական գործողություներ աշխարհի տարբեր հատվածներում ու հենց Մերձավոր արևելքում:
Հիշեցնենք, որ 2001թ.–ի սեպտեմբերի 11–ին «Ալ Քայիդայի» ահաբեկչական կազմակերպության 19 անդամներ, բաժանվելով 4 խմբի, գրավել էին չորս ուղևորատար ինքնաթիռ: Խմբերից յուրաքանչյուրն ուներ առնվազն մեկ անդամ, որը թռիչքային պատրաստություն էր անցել: Ահաբեկիչները երկու ինքնաթիռներն ուղղել էին ԱՀԿ աշտարակների վրա, որոնք գտնվում էին Նյու Յորքի Մանհեթենի հարավային մասում: American Airlines 11 չվերթն իրականացնող ինքնաթիռը բախվել էր WTC-1 հյուսիսային աշտարակին, իսկ 175 United Airlines չվերթը՝ WTC-2 հարավայինին: Արդյունքում, երկու աշտարակները փլուզվել էին` լուրջ ավերածությունների պատճառ դառնալով շրջակայքում:
Երրորդ ինքնաիթռը՝ 77 American Airlines չվերթն, ուղղվեց Պենտագոնի ուղղությամբ: 93 United Airlines չվերթի ուղևորներն ու անձնակազմը փորձեցին ահաբեկիչներից խլել ինքնաթիռի կառավարումը, սակայն ինքնաթիռը կործանվեց Փենսիլվանիա նահանգի Շենքսվիլ քաղաքի մերձակայքում: 19 ահաբեկչից բացի գրոհների արդյունքում զոհվեց 2977 մարդ 57 երկրից, ևս 24 –ը համարվում են անհետ կորած: Զոհվածների մեծ մասը քաղաքացիական անձիք էին: Գրոհների պատասխանատվությունը ստանձնեց «Ալ Քայիդա» ահաբեկչական կազմակերպությունը:
