ԵՐԵՎԱՆ, 12 սեպտեմբերի – Sputnik. Երևան-Մոսկվա-Երևան ավիատոմսերի արժեքը նվազել է շուրջ 30%-ով։ Այս տեղեկությունը հաստատեց զբոսաշրջային բիզնեսով զբաղվող մասնագետ Վլադիմիր Գևորգյանը։
«Եթե հուլիս-օգոստոս ամիսներին երկկողմանի չվերթի տոմսն արժեր 150-160 հազար դրամ, ապա այսօր այն կարելի է ձեռք բերել 100 —110 հազար դրամով»,- ասաց մեր զրուցակիցը` ավիատոմսերի արժեքի փոփոխությունը պայմանավորելով պահանջարկով։
Ռուսաստանյան փորձագետները ևս փաստում են, որ Երևանը վերջին 1-2 տարիներին ՌԴ-ում համարվում է պահանջված ուղղություն։
Վերլուծությունների համաձայն` Երևանը հայտնվել է ռուսաստանյան ամենահայտնի ավիաուղղությունների առաջին եռյակում։
Ռուսաստանցի զբոսաշրջիկների նախասիրած ուղղությունները մնում են Չեխիայի մայրաքաղաք Պրահան ու Իսրայելը։ Երկրորդ տեղում են Թուրքիան ու Կիպրոսը։
Նախկին ԽՍՀՄ տարածքում ամենապահանջված ուղղություններն են Քիշնևը, Երևանն ու Թբիլիսին։
Ռուս վերլուծաբանների դիտարկմամբ, բոլոր այս զբոսաշրջային նախընտրելի ուղղությունների ավիատոմսերի գները միջինը 20%-ով նվազել են` հատկապես պահանջարկի ավելացման շնորհիվ։
Ինչ վերաբերում է եվրոպական երկրների տոմսերի գնին, ապա դրանցում էժանացումն աննկատ է` 1.2%: Իսկ երկրի ներսում ավիափոխադրումներն անգամ թանկացել են` 1.3%-ով։
