ԵՐԵՎԱՆ, 13 սեպտեմբերի — Sputnik. Ամերիկայի Միացյալ Նահանգները չի պատրաստվում չեղարկել Հայաստանի հետ կրկնակի հարկումը, այսօր լրագրողներին ասաց Հայաստանում ԱՄՆ դեսպան Ռիչարդ Միլսը։
«Մենք նշել ենք, որ կրկնակի հարկման համաձայնագրի ստորագրումը կդիտարկվի, եթե դրա անհրաժեշտությունն իսկապես առաջանա»,- ասաց Միլսը։
Նրա խոսքով` 70-ական թվականների ընդունված կրկնակի հարկման վերաբերյալ համաձայնագիրը լիովին բավարարում է երկու երկրների առևտրային հարաբերությունների իրականացմանը։
«Մենք սպասում ենք, թե ինչ փաստարկներ կներկայացնի Հայաստանի կառավարությունը, որոնցով կհիմնավորվի նոր համաձայնագրի անհրաժեշտությունը»,- ասաց Միլսը։
Հայ-ամերիկյան առևտրային պալատը ԱՄՆ դեսպանատան հետ համատեղ համաժողով է կազմակերպել հայ գործարարների համար, որպեսզի ներկայացնեն արտոնությունների ընդհանրացված համակարգի կամ GSP համակարգի հնարավորությունները
Միլսը նշեց, որ այս ծրագրի շրջանակում որոշակի երկրներից որոշակի ապրանքատեսակներ հնարավոր է ԱՄՆ արտահանել արտոնյալ ռեժիմով, և այս պահին Հայաստանից ԱՄՆ արտահանումների 60 տոկոսը իրականացվում է հենց GSP ռեժիմի ներքո։ Նա նշեց, որ այդ ապրանքներն են ալյումինե փայլաթիթեղը, ջեմերը, ոսկերչական իրերը:
Նա հույս հայտնեց, որ հայ գործարարները կօգտվեն համակարգի բոլոր հնարավորություններից։
GSP ծրագիրը ԱՄՆ-ում ընդունվել է 1974 թվականին։ Ծրագրի պայմանների համաձայն` նվազեցված դրույթներով կամ առանց մաքսային վճարումների ապրանքների ներմուծումն իրականացվում է ավելի քան 120 երկրից, այդ թվում` Հայաստանից։ 2009 թվականի հունվարի 1-ից Հայաստանն ընդգրկվել է GSP+ ռեժիմ ստացած երկրների ցանկում։
