ԵՐԵՎԱՆ, 14 սեպտեմբերի — Sputnik. ՀՀ նախագահ Սերժ Սարգսյանն այսօր շնորհավորական ուղերձ է հղել Ռուսաստանի Դաշնության կառավարության նախագահ Դմիտրի Մեդվեդևին՝ ծննդյան օրվա առթիվ:
«Ընդունեք սրտանց շնորհավորանքներ Ձեր ծննդյան օրվա առթիվ: Պետական և քաղաքական գործունեության հարուստ փորձը, որին Դուք, անկասկած, տիրապետում եք, դրված ուղենիշներին հասնելու Ձեզ հատուկ նպատակասլացությունը Ձեզ արժանացրել են խորը հարգանքի հայրենակիցների շրջանում և բարձր հեղինակության արտերկրում»,- նշել է Սարգսյանը:
ՀՀ նախագահը երախտագիտությամբ նշել է մեր երկրների միջև դաշնակցային հարաբերությունների զարգացման գործում Մեդվեդևի անձնական ներդրումը, առևտրատնտեսական, ներդրումային և մշակութային-հումանիտար ոլորտներում հայ-ռուսական պայմանավորվածությունների իրականացման գործում Մեդվեդևի հետևողականությունը:
«Ձեզ հետ հանդիպումները միշտ ունենում են գործնական և անձնական շփման բաց, վստահելի բնույթ: Ուրախ կլինեմ կրկին ողջունել Ձեզ Երևանում՝ Հայաստան կատարելիք Ձեր պաշտոնական այցի ընթացքում»,- ասել է Սարգսյանը:
Նա Մեդվեդևին և նրա հարազատներին մաղթել է քաջառողջություն, երջանկություն և բարօրություն:
