ԵՐԵՎԱՆ, 17 սեպտեմբերի — Sputnik. Գրոսմայստեր Լևոն Արոնյանն իր «ամենակարող օգնականի» հետ Թբիլիսի է մեկնել` մասնակցելու շախմատի աշխարհի գավաթին։ Այդ մասին շախմատիստը հայտնել է chess-news.ru-ին։
«Լավ է, երբ մրցաշարին քեզ հետ լինում է մեկը, ով կարող է օգնել ցանկացած հարցում։ Չէ՞ որ նման մրցումների ժամանակ մեծ ջանքեր են պետք նաև շախմատին չվերաբերող մանր հարցերը լուծելու համար», — ասել է գրոսմայստերը` չնշելով, թե կոնկրետ ով է այդ մարդը։
Ինչ վերաբերում է «շախմատային» աջակցությանը, Արոնյանին մրցաշարի ժամանակ օգնում է գրոսմայստեր Աշոտ Նադանյանը։
Թբիլիսիում անցկացվող Աշխարհի գավաթին Լևոն Արոնյանն անցել է կիսաեզրափակիչ փուլ, որտեղ կմրցի Պյոտր Սվիդլեր-Մաքսիմ Վաշյե Լագրավ զույգում հաղթողի հետ։ Հաղթողը կորոշվի այսօր։
