ԵՐԵՎԱՆ, 18 սեպտեմբերի — Sputnik. Մայիսյան հաղթական հերոսամարտերի և Հայաստանի առաջին Հանրապետության հռչակման 100-ամյակի նախաշեմին` 2017թ. սեպտեմբերի 18-20-ը Երևանում անցկացվում է «Փոխադարձ վստահություն, միասնականություն և պատասխանատվություն» խորագրով Հայաստան-Սփյուռք հերթական 6-րդ համահայկական համաժողովը:
Սփյուռքահայերը համաժողովին ներկայացել են կոնկրետ առաջարկներով:
Հայ երիտասարդաց ընկերակցության մամուլի պատասխանատու, լիբանանահայ Ահարոն Շխրտումյանը Sputnik Արմենիայի հետ զրույցում հայտնեց, որ ավանդական կերպով Սփյուռքի լավագույն կենտրոններից մեկը ճանաչված Լիբանանում այսօր հայապահպանության խնդիր կա:
«Այսօր Լիբանանի հայ համայնքը չի ներկայացնում այն, ինչ պատկերացնում ենք: Որակի զգալի տագնապ, անկում կա: Համապատասխան ղեկավարությունն իր պարտականություններում թերանում է: Տեսլական ունեցող ղեկավարների ու կառույցների պակաս կա»,-ասաց Շխրտումյանը:
Նրա համոզմամբ՝ նման համագումարները կարող են նոր լիցք հաղորդել Սփյուռքի ղեկավարությանն ու ժողովրդին:
«Սփյուռքն ու հայրենիքը «դատապարտված» են համագործակցել, այլ տարբերակ չունենք: Ես քիչ անց պետք է ելույթ ունենամ, շատ հարցեր կան, որ մեզ հետաքրքրում են, օրինակ, արտագաղթը, այդ թվում՝ նաև Սփյուռքում հայապահպանության խնդիրը: Երբ հայը հայերեն չի խոսում, սա մտահոգիչ երևույթ է»,-ասաց նա:
Sputnik Արմենիայի այն դիտարկմանը, որ Սփյուռքում որոշակի հատված դժգոհում է հայաստանյան իշխանության գործելաոճից ու Սփյուռքում առկա խնդիրները կապում է հենց դրա հետ, մեր զրուցակիցը պատասխանեց՝ ցանկացած իշխանություն ունի իր ընդդիմությունը:
«Սփյուռքը, որքան էլ ունի քննադատություններ հայկական իշխանության վերաբերյալ, սակայն մեր աշխատանքն ուղղում ենք հանուն ամուր պետականության»,-ասաց Շխրտումյանը:
Ամերիկահայ Մինաս Կոջոյանը համաժողովից մեծ հույսեր չունի, սակայն որոշակի ակնկալիքներ, այնուամենայնիվ, կան:
«Ուզում եմ, որ մեր երիտասարդությունն Արևմուտքում ունենա հայի երանելի օրինակ, ինչպես, ասենք, Քըրքորյանն էր: Մենք օվկիանոսով ենք բաժանված, և կարելի է ասել, որ մեր երիտասարդությունը նետված է այդ օվկիանոսի մեջ: Պետք է այնպես անենք, որ այդ երիտասարդությունն օվկիանոսից չոր դուրս գա, այսինքն՝ չձուլվի օտարների հետ»,-ասաց Կոջայանը:
Նրա խոսքով՝ Սփյուռքում կա հիանալի երիտասարդություն, բայց պետք է աշխատել նրանց հետ: Ինքը՝ որպես 40 տարվա մանկավարժ, պատրաստ է թեկուզ փոքրիկ ներդրումն ունենալ այս հարցում:
Տեղեկացնենք, որ Հայաստան-Սփյուռք համաժողովին ներկա են Սփյուռքի կարկառուն ներկայացուցիչներ ավելի քան 58 երկրից, մարդիկ, ովքեր ապահովում են ներդրումային մեծ հոսքեր, միասնաբար գործում հայկական լոբբիի ուղղությամբ ու պայքարում հայապահպանության համար:
Համաժողովին ներկա են նաև Հայաստանի Հանրապետության և Արցախի Հանրապետության պետական բարձրաստիճան այրեր և հոգևոր առաջնորդներ:
