ԵՐԵՎԱՆ, 18 սեպտեմբերի — Sputnik. Սփյուռքը խզում է կապերը Հայաստանի հետ: Այս կարծիքն այսօր հայտնեց Կիպրոսի թեմի առաջնորդ գերաշնորհ տեր Խորեն արքեպիսկոպոս Տողրամաջյանը Հայաստան-Սփյուռք համաժողովից դուրս՝ լրագրողների հետ զրույցում:
«Մարդիկ, որոնք դուրս են գալիս Հայաստանից, տարբեր պատճառաբանություններ ունեն` ոմանք տնտեսական պատճառներ ունեն, ոմանք իրենց զավակներին բանակից են փախցնում ու չեն ցանկանում կապ պահել Հայաստանի հետ»,-ասաց Կիպրոսի հայ հոգևորականը:
Իհարկե, նման պահվածքը նա սխալ է համարում, քանի որ վստահ է՝ հայրենիքի հետ կապ պետք է պահել՝ անկախ քաղաքական իրադրությունից:
«Հայաստանը մեր բոլորի տունն է, մեր բոլորի հայրենիքը: Մեր սիրտը, մեր կամքը, մեր ուժերը դեպի հայրենիք պետք է փոխադրենք, թեկուզ հեռվում լինենք, բայց մեր կապերը չխզենք: Չեմ կարծում, որ հայրենիքը կարող է մեկին նեղացնել, կարող են անձերը նեղացնել: Մենք չպետք է զոհենք հայրենիքը, մենք պետք է ավելին տանք հայրենիքին»,-ասաց Կիպրոսի թեմի առաջնորդը:
Գերաշնորհ տեր Խորեն արքեպիսկոպոս Տողրամաջյանն իրեն յուրովի զինվոր է համարում, վստահեցնում է, որ մի օր ինքն էլ կվերադառնա Հայաստան, բայց իր առաքելությունն ավարտելուց հետո:
