ԵՐԵՎԱՆ, 20 սեպտեմբերի — Sputnik. ՀՀ արտգործնախարար Էդվարդ Նալբանդյանը բարձրաձայնել է Արցախի հակամարտության կարգավորման պայմանագրի բաղադրիչներից մեկը՝ որևէ նոր բան չասելով, ասել է ՀՅԴ Բյուրոյի Հայ դատի և քաղաքական հարցերի գրասենյակի տնօրեն Կիրո Մանոյանը։
Ավելի վաղ ԶԼՄ–ներում տեղեկություն էր հայտնվել այն մասին, որ ՀՀ արտգործնախարար Էդվարդ Նալբանդյանը «Հայաստան–Սփյուռք» համաժողովի մասնակիցների հետ հանդիպման ժամանակ ասել է, որ Երևանը կարող է Ադրբեջանին վերադարձնել այն տարածքները, որոնք չեն սպառնա Արցախի անվտանգությանը։
«Դա չի նշանակում, որ Հայաստանը համաձայն է զիջումների գնալ։ Զիջումներ կլինեն միայն այն դեպքում, եթե Բաքուն ճանաչի Արցախի ժողովրդի ինքնորոշման իրավունքը»,– ասել է Մանոյանը։
Մանոյանը վստահ է, որ Երևանն առաջինը պետք է չբարձրացնի զիջումների մասին հարցը, իսկ հակամարտության սրացման պարագայում Հայաստանը կճանաչի Արցախի անկախությունը, ինչի մասին բազմիցս հայտարարվել է երկրի իշխանությունների մակարդակով։
«Պատահական չէ, որ քառօրյա պատերազմից հետո նախագահը հրամայեց ՀՀ արտգործնախարարին՝ նախապատրաստել Հայաստանի և Արցախի միջև ռազմաքաղաքական գործակցության պայմանագիր»,– ասել է Մանոյանը։
Նա համոզված է, որ համբերությունը հատել է, և Հայաստանը պետք է ճանաչի Արցախի անկախությունը։
