ԵՐԵՎԱՆ, 20 սեպտեմբերի — Sputnik. ՀՀ արդարադատության նախարարության «Նուբարաշեն» քրեակատարողական հիմնարկի խցերից մեկում սեպտեմբերի 1-ին դատապարտյալների միջև ծեծկռտուք է տեղի ունեցել։ Այս տեղեկատվությունը Sputnik Արմենիայի հետ զրույցում հաստատեց ՀՀ ՔԿՎ տեղեկատվության և հասարակայնության հետ կապերի բաժնի պետ Գոռ Ղլեչյանը։
Նա հայտնեց նաև, որ ՀՀ քննչական կոմիտեում այս փաստով հարուցվել է քրեական գործ։
Այլ մանրամասներ այս պահին չեն հայտնում։
Մամուլում առկա տեղեկությունների համաձայն` ծեծկռտուքը տեղի է ունեցել երևանցի Վահե Միքայելյանի, Շիրակի մարզի Անուշավան գյուղի բնակիչ Արա Սահակյանի և Արմավիրի մարզի Շահումյան գյուղի բնակիչ Արման Կարապետյանի միջև։ Ծեծի մասնակիցները ստացել են մարմնական վնասվածքներ։
