ԵՐԵՎԱՆ, 22 սեպտեմբերի-Sputnik. Կառավարությունը գյուղատնտեսությունը ճանաչել է գերակա ոլորտներից մեկը: Գործադիրը շեշտը դնում է գյուղական համայնքների տնտեսական մեծ ներուժը բացահայտելու, անհրաժեշտ պայմաններ ապահովելու և այն արդյունավետ իրագործելու վրա: Այնինչ, կառավարության ղեկավարն արձանագրեց, որ գյուղատնտեսական աճ չի նկատվում:
«Վերջին ամիսներին գյուղատնտեսությանը վերաբերող վիճակագրական արդյունքները մտահոգության տեղիք են տալիս, հետևաբար, անհրաժեշտ է ապահովել ոլորտում ձևավորվող համախառն արդյունքի հաշվառման վերլուծության կատարումը»,- ասաց Կարապետյանը:
Ուստի վարչապետ Կարեն Կարապետյանը հանձնարարեց գյուղատնտեսության, տարածքային կառավարման և զարգացման նախարարներին, մարզպետներին երկշաբաթյա ժամկետում ամփոփել ու կառավարության աշխատակազմ ներկայացնել վիճակագրություն գյուղատնտեսության ոլորտում արձանագրված ցուցանիշների վերլուծության վերաբերյալ:
«Մենք հունվարից օգոստոս ընկած ժամանակահատվածում նախորդ տարվա նույն ժամկետի համեմատ բոլոր ոլորտներում ունենք աճ, բացի գյուղատնտեսությունից և շինարարությունից»,- ասաց վարչապետը:
Ինչ վերաբերում է գյուղատնտեսության ոլորտին, վարչապետն ասաց, որ լուրջ խնդիր կա, որին պետք է անհապաղ անդրադառնալ: