ԵՐԵՎԱՆ, 22 սեպտեմբերի — Sputnik. Հայաստանն ու Իրանը համագործակցություն են հաստատում նանոտեխնոլոգիաների ոլորտում։
Երևանում մեկնարկել է «Նանոգիտություն և տեխնոլոգիաներ» խորագիրը կրող հայ-իրանական երկօրյա համաժողովը, որը հարթակ է լինելու երկու երկրների գիտնականների համագործակցության համար։
«Համաժողովի ընթացքում առաջարկած լուծումները կարող են հետագայում ներդրվել բարձր տեխնոլոգիաներ կիրառող ընկերություններում», — ասել է ՀՀ տնտեսական զարգացման և ներդրումների նախարար Սուրեն Կարայանը։
Նախարարը նշել է, որ վերջերս է այցելել Արաս ազատ տնտեսական գոտի և համոզվել, որ բարեկամ Իրանը լուրջ հաջողություններ է արձանագրել։
Նրա խոսքով` այդ պայմաններում լավ հնարավորություններ են հայկական բիզնեսի համար բացվում։
Հայաստանում Իրանի արտակարգ և լիազոր դեսպան Քազեմ Սաջադն իր հերթին նշել է, որ ժողովուրդներն օրեցօր ավելի լավ են սկսում ճանաչել միմյանց և երկու երկրների հնարավորությունները։
«Իրանցի հայտնի գիտնականները լուրջ արդյունքների են հասել նանոտեխնոլոգիաների ոլորտում։ Հուսով ենք, որ հայկական կողմը կկարողանա լավագույնս օգտագործել այդ հնարավորությունները, ինչպես նաև լավագույն ցուցանիշների հասնել», — ասել է Սաջադը։
Իրանի նանոտեխնոլոգիական նախաձեռնությունների խորհրդի գլխավոր քարտուղար, պրոֆեսոր Սաեդ Սարկարն ավելացրել է, որ երկու երկրների փոխգործակցությունն այդ ոլորտում լուրջ և բավական խորը կլինի։
Նանոտեխնոլոգիաների ոլորտում գործող ընկերությունները կներկայացնեն իրենց արտադրանքն ու սարքավորումները։ Կողմերը կքննարկեն համագործակցության հավանական ուղղություններին վերաբերող հարցեր։
