ԵՐԵՎԱՆ, 22 սեպտեմբերի — Sputnik. Հայ գրոսմայստեր Լևոն Արոնյանը որոշել է մի քիչ էլ մնալ Թբիլիսիում առաջիկա հարսանիքի նախապատրաստական աշխատանքներով չզբաղվելու համար։ Այդ մասին Արոնյանը խոստովանել է chess-news.ru-ին տված հարցազրույցում։
«Որքան ավելի երկար մնամ այստեղ, այնքան քիչ կզբաղվեմ հարսանիքի դիզայնով, հյուրերի ու հարսանեկան հարցերով», — ասել է գրոսմայստերը։
Արոնյանի ապագա կինը` Արիանա Կաոլին, այս օրերին Հայաստանում է և զբաղվում է հարսանեկան արարողության նախապատրաստական գործերով (տոնակատարությունը տեղի է ունենալու Երևանում սեպտեմբերի 30-ին — խմբ.)։
«Քանի դեռ մենք այստեղ ֆիգուրներ ենք տեղափոխում, նա լուրջ գործերով է զբաղվում», — ասել է Արոնյանը։
Շախմատիստի խոսքով` Արիանային չի մտահոգում ապագա ամուսնու զբաղվածությունը։
«Նա միշտ հետևում է իմ խաղերին և շատ է անհանգստանում, երբ պարտվում եմ», — ասել է շախմատիստը։
Արոնյանը նաև նշել է, որ հասել է իր գլխավոր նպատակին և համալրել հավակնորդների մրցաշարի մասնակիցների կազմը։
Աշխարհի գավաթի խաղարկության եզրափակիչ փուլում Լևոն Արոնյանը կպայքարի չինացի Դին Լիժենի հետ, որը կիսաեզրափակիչում հաղթել է ամերիկացի Ուեսլի Սոյին։
Ի տարբերություն նախորդ փուլերի, շախմատիստները չորս դասական պարտիա են խաղալու երկուսի փոխարեն։ Ոչ-ոքիի դեպքում կգործի նույն սխեման։
