ԵՐԵՎԱՆ, 25 սեպտեմբերի — Sputnik. Բաքվում «Եվրանեսթ» խորհրդարանական վեհաժողովին մասնակցած «Ելք» խմբակցության պատգամավոր Մանե Թանդիլյանը Sputnik Արմենիայի հետ զրույցում նշում է, որ Բաքու այցելելու առաջին իսկ պահից նկատվել է հակահայկական տրամադրությունը։ «Մեր ամեն քայլափոխը հետևվում էր, մեզ անընդհատ լսում էին, գիտեինք, որ մեզ ուղեկցողը գերազանց տիրապետում է հայերենին, այո տհաճ էր ամեն վայրկյան լինել հետապնդվողի կարգավիճակում, բայց նաև պետք էր, որ մեզ բնական պահեինք, որ տպավորություն չստեղծվեր, թե մենք այդ երկրում մեզ ճնշված ենք զգում»,- մեզ հետ զրույցում Բաքվի քննարկումներից իր տպավորություններն է ներկայացնում «Ելք» խմբակցության պատգամավոր Մանե Թանդիլյանը։
Պատգամավորի խոսքով`ադրբեջանական կողմը նիստն ամեն պահի վեր էր ածում հակահայկական քարոզի և շատ լավ էր, որ իրենք այնտեղ էին։ «Հայաստանյան կողմը առիթը չպետք է բաց թողնի` մասնակցելու տարբեր միջազգային հարթակների քննարկումներին և հակադարձելու ադրբեջանական ապատեղեկատվությանը: Չկան անկարևոր հարթակներ, հանդիպումներ. ամենուր պետք է արտահայտենք մեր դիրքորոշումը և հակադարձենք ու զսպենք մեր հարևանների հակահայկական արշավը: Իհարկե, մեր եվրոպացի գործընկերները ևս հակադարձում էին` նկատելով, որ հարցերը օրակարգից դուրս են և չպետք է շեղվել նիստի բուն նյութից»,–պատմում է Թանդիլյանը:
Ինչ վերաբերում է «Եվրանեսթ» խորհրդարանական վեհաժողովի հայաստանյան պատվիրակության ղեկավար Արմեն Աշոտյանի և անդամ Մանե Թանդիլյանի հասցեին հնչած այլ քննադատություններին, մասնավորապես, Բաքվում հայկական կոնյակ խմելուն, ապա ըստ պատգամավորի` մեր երկրի անկախության օրը հայկական կոնյակով բաժակ բարձրացնելը նորմալ է, իսկ քննադատությունը մի քիչ անհասկանալի:
«Օրը 24 ժամ համատարած վերահսկողության պայմաններում գտնվելով`դու պետք է կարողանաս լինել այնպիսին, ինչպիսին կաս։ Դեմքիդ յուրաքանչյուր մկանի շարժում նրանց հուշում է հոգեվիճակիդ մասին։ Ես կարծում եմ, որ այն, ինչ կանեինք մեկ այլ երկրում, արել ենք նաև Բաքվում: Մենք մեզ շատ բնական ենք պահել»,–ասում է պատգամավորը։
Պաշտոնական Բաքվի պահվածքից ու հյուրընկալությունից հայկական պատվիրակությունը դժգոհ չէ: Ճիշտ է` սկզբում հյուրանոցը չի ցանկացել ընդունել, հետո արդեն, երբ տեղեկացել են ովքեր են հյուրերը և ինչ նպատակով են եկել` խնդիրը հարթվել է: «Պաշտոնական Բաքուն մեկ պարտավորություն ուներ` ապահովել մեր ֆիզիկական անվտանգությունը, ինչով և զբաղված էր»:
Հիշեցնենք, որ «Եվրանեսթ» խորհրդարանական վեհաժողովի հայաստանյան պատվիրակության ղեկավար Արմեն Աշոտյանը և անդամ Մանե Թանդիլյանն օրերս Բաքվում մասնակցում էին խորհրդարանական վերաժողովի հանձնաժողովներից մեկի նիստին:
