ԵՐԵՎԱՆ, 26 սեպտեմբերի — Sputnik. Իրաքի Քրդստանում հանրաքվեին մասնակցածների ավելի քան 93 տոկոսը կողմ է քվեարկել շրջանի անկախացմանը, վկայում է 282 հազար ձայնի հաշվարկը, ՌԻԱ Նովոստիին հայտնել են Քրդիստանի հանրաքվեի եւ ընտրությունների Բարձրագույն անկախ հանձնաժողովից:
«Հաշվումը շարունակվում է, հաշվվել է 282 հազար 17 ձայն: Անկախությանը կողմ է քվեարկել ընտրողների 93,29 տոկոսը, դեմ՝ 6,71 տոկոսը»,- հայտարարել է հանձնաժողովի նախագահը: Նա նշել է, որ արդյունքները կարող են փոխվել, քանի որ հաշվվումը շարունակվում է: Պաշտոնական արդյունքները կհրապարակվեն հինգշաբթի:
Վերջին տվյալներով՝ հանրաքվեին մասնակցել է մոտ 3,3 մլն մարդ:
Բարձրագույն ընտրական հանձնաժողովի տվյալներով՝ ընտրություններում ձայնի իրավունք ուներ 5,2 մլն ընտրող: Քվեարկությանը կարող էին մասնակցել Իրաքի բոլոր քաղաքացիները, որոնք հաշվառված են Իրաքի Քրդստանի տարածքում կամ քրդական շրջաններում: Ստեղծվել էր 6846 ընտրատեղամաս եւ 1737 հանձնաժողով:
