ԵՐԵՎԱՆ, 27 Սեպտեմբեր — Sputnik, Արմենուհի Մխոյան. Շիրակի մայր բուհի կրքերը հանդարտեցնելու նպատակով սեպտեմբերի 27-ին երեկոյան աշխատանքային այցով Գյումրիում էր ՀՀ ԿԳ նախարար Լևոն Մկրտչյանը:
Նախարարը նախ հանդիպեց բաց նամակի հեղինակների` համալսարանի դասախոսներ Հովհաննես Խորիկյանի ու Գագիկ Համբարյան հետ, լսեց նրանց բոլոր փաստարկները` կապված վերջին տարիներին բուհում տիրող իրավիճակի, իրենց նշած չարաշահումների հետ, անդրադարձավ նաև ՀՀ նախագահին ու վարչապետին ուղղված բաց նամակի դրույթներին:
Նախարար Մկրտչյանը բավականին երկարատև զրուցեց նաև ուսանողների հետ: Բուհի սաները ներկայացրին վարձավճարների զեղչերի կարգի փոփոխման, ուսումնական պլանի ոչ լիարժեք կատարման և բուհում ինտեգրված ուսուցում ներդնելու հետ կապված իրենց բողոքները: Նախարարն անկեղծացավ՝ հիացած է ուսանողներով ու շատ կուզար նման ուսանողների դասավանդել:
«Ես կերազեի, որ որտեղ դասավանդում են նման մտածողության ու նվիրվածության ուսանողներ լինեն: Իրենք հարցերը դրեցին շատ ավելի հստակ, քան դասախոսական կազմն է խոսում։ Նրանք, մեկը մյուսին հերթ չտալով, խոսեցին իրենց իրավունքներից»,-նշեց նախարարը:
Այն, որ բուհում մի շարք խնդիրներ միջանձնային են, նախարարն ինքն էլ նկատեց: «Ցավոք, Գյումրիին մի քիչ բնորոշ է սուբյեկտիվ անձնավորված հարաբերությունները, մեղադրանքները: Ես բոլորին կոչ արեցի, որ գիտակցեն, որ համալսարանական են, և «Շիրակի» համալսարանի հեղինակության խնդիր կա: Ուսումնասիրենք ու հասկանանք: Չեմ կարծում, որ խորքային անլուծելի հարց կա»,-նշեց Լևոն Մկրտչյանը՝ հավելելով «Շիրակի» համալսարանում կիրականացվեն համալիր ստուգումներ:
Քանի որ հարցադրումները շատ են ու բազմաբնույթ, այստեղ կարիք ունենք համալիր հետազոտության: Հարցադրումներն հիմնակնում երեք հարթության էին՝ այդ թվում նաև կրթական ծրագրերի բովանդակության: Իմ համար, օրինակ, շատ օգտակար էր ուսանողների հետ հանդիպումը՝ պարզեցի, որ ուսանողները կուրսը կրկնում են՝ երկրորդ տարին նույն առարկան են անցնում, և այստեղ հարց կա: Երկրորդ հարթությունը կազմակերպական, կառավարական հարցերն էին: Ստուգումներ կանենք նաև գրադարանում՝ երկու տարբեր տեսակետներ կան նաև գրադարանի հետ կապված: Աշխատավարձերի համալիր ստուգում կանենք՝ վերջին 4-5 տարիների կտրվածքով»,-նշեց նախարարը՝ փաստելով ինտեգրացված ուսուցման ձևաչափը և ադմինիստրատիվ աշխատողների աշխատավարձերը ևս կուսումնասիրվեն:
Հիշեցնենք, որ Շիրակի պետական համալսարանի դասախոսներ Հովհաննես Խորիկյանն ու Գագիկ Համբարյանը բաց նամակով դիմել են ՀՀ նախագահին ու վարչապետին` հայտարարելով, որ ռեկտոր Սահակ Մինասյանը մեկ տարի շարունակ ավերում է բուհը` հանուն սեփական շահադիտական նպատակների: Ռեկտորը նրանց մեղադրանքներն անհիմն է համարում։
