ԵՐԵՎԱՆ, 28 սեպտեմբերի — Sputnik. ՀՀ վարչապետ Կարեն Կարապետյանը ֆեսբուքյան պաշտոնական իր էջում շնորհավորել է Լևոն Արոնյանին`շախմատի աշխարհի խաղարկությունում հաղթանակ տանելու համար։
«12 տարի անց կրկին դառնալ աշխարհի գավաթակիր… Լևո՜ն ջան /Levon Aronian/, հիանում ենք քեզանով։ Այս խաղի հանդեպ ցուցաբերած քո վճռականությունն ու հավասարակշռվածությունը հրաշալի օրինակ և ոգեշնչման աղբյուր են երիտասարդ հայ շախմատիստների համար։ Դու ևս մեկ անգամ բարձր պահեցիր մեր երկրի անունն ու ստիպեցիր բոլորիս լցվել հպարտության զգացումով։ Կեցցե՜ս»,–գրել է վարչապետը։
Հիշեցնենք, որ սեպտեմբերի 27–ին Թբիլիսիում ընթացող շախմատի աշխարհի գավաթի խաղարկության եզրափակիչում հայ գրոսմայստեր Լևոն Արոնյանը դասական պարտիաներով չորս անընդմեջ ոչ ոքիներից հետո, արագ շախմատում առավելության հասավ չինացի Լիրեն Դինգի նկատմամբ ու դարձավ աշխարհի գավաթակիր:
