ԵՐԵՎԱՆ, 30 սեպտեմբերի — Sputnik. RT-ի գլխավոր խմբագիր Մարգարիտա Սիմոնյանը հայտարարել է, որ ԱՄՆ իշխանության պահանջներն անօրինական են։
Սեպտեմբերի սկզբին ԱՄՆ արդարադատության նախարարությունը պարտադրել է, որ այն ընկերությունը, որը ԱՄՆ-ում սպասարկում է RT America հեռուստաալիքը (ներառյալ` գործունեությունն ու հեռուստաարտադրանքը), գրանցվի որպես օտարերկրյա գործակալ։
Նշենք, որ ԱՄՆ ներկայացուցիչների պալատն օրինագիծ է քննարկել` օտարերկրյա գործակալների գրանցման պահանջները փոխելու նպատակով։ Նախագիծը ենթադրում է, որ ԱՄՆ արդարադատության նախարարը նոր լիազորություններ է ստանալու, որը թույլ է տալու բացահայտել ու դատարանով հետապնդել այն կազմակերպություններին, որոնք փորձում են ազդել ԱՄՆ-ի քաղաքական գործընթացների վրա։
«Օրենքի համաձայն, եթե մեզ հիմա գրանցեն, նրանք կարող են պահանջել (ու ես գրեթե չեմ կասկածում, որ կպահանջեն) մեր բոլոր աշխատակիցների հրապարակումները, նրանց աշխատավարձերի, տան հասցեների ու հեռախոսահամարների մասին տեղեկություններ։ Շա՞տ մարդ կմնա մեզ մոտ աշխատելու։ Եթե ինձանից նման բան պահանջեին, ես կհեռանայի, քանի որ իմ երեխաներն ու նրանց անվտանգությունն ամենակարևորն է», — Առաջին ալիքով հեռարձակվող «Վրեմյա պոկաժետ» հաղորդման ժամանակ ասել է Սիմոնյանը։
Նա ընդգծել է, որ «ոչ մի ԶԼՄ իր աշխատակիցներից նման զոհեր պահանջելու իրավունք չունի»։
«Այնտեղ բազում նման պահանջներ կան։ Մենք պետք է նշենք բոլոր մարդկանց, որոնց հետ շփվում ենք, պետք է հարցազրույցի պարունակությունն ամբողջությամբ ուղարկենք», — ասել է գլխավոր խմբագիրը։
Նրա խոսքով՝ եթե ԱՄՆ-ում հեռուստաալիքը փակեն, նրանք «կխախտեն խոսքի ազատությունը»։
«Այդ պատճառով չեն կարող փակել։ Եվ կանեն այնպես, որ չկարողանանք աշխատել։ Երբ հեռուստաընկերությանը ստիպում են մատնել իր աշխատակիցներին, հեռուստաալիքը զիջում է իր դիրքերն ու ստիպված է լինում ինքը հեռանալ», — ասել է Սիմոնյանը։
Նա նշել է, որ որպես օտարերկրյա գործակալ գրանցվելու մասին պահանջն անօրինական է։
«Այդ օրենքը ԶԼՄ-ների համար չէ, մենք այդ օրենքի տակ չենք ընկնում։ Այսինքն գրանցվելու պահանջներն ապօրինի են։ Մեզ այդ մասին ամերիկյան իրավաբաններն են ասում․ պահանջն ապօրինի է ու հակասում է Միացյալ Նահանգների օրենսդրությանը», — նշել է Սիմոնյանը։
«Համենայն դեպս, մենք պարտավոր ենք գրանցվել, ինչպես մեզ ասում են հենց նույն իրավաբանները, քանի որ եթե չանենք, ապա հաջորդ քայլով հոկտեմբերի 17-ին կկալանավորեն մեր աշխատակիցներին ու մեր գույքը», — ասել է նա։
