Sputnik Արմենիան ներկայացնում է աստղային զույգեր, որոնց` ժամանակին նախանձելի փեսացու համարվող հայ հայտնիները, կյանքի ուղեկից են ընտրել այլազգի աղջկա:
Լևոն Արոնյան և Արիանա Կաոիլի
Հայաստանի շախմատի հավաքականի առաջնորդ, Աշխարհի գավաթի կրկնակի չեմպիոն Լևոն Արոնյանն իր ապագա կնոջ` շախմատիստ Արիանայի հետ ծանոթացել է 1996 թվականին: Ֆիլիպինուհին, սակայն, միանգամից չի դարձել Լևոնի մուսան ու սիրելի կինը:
Նրանք սկսեցել են հանդիպել 2006 թվականից: Իսկ նախօրեին տեղի է ունեցել նրանց պսակադրության արարողությունը: Լևոնի և Արիանայի հարսանյաց հանդեսը հայկական ավանդական է եղել: Քավորի դերում ՀՀ նախագահ Սերժ Սարգսյանն էր:
Ալեքսիս Օհանյան և Սերենա Ուիլյամս
Կար ժամանակ, երբ հայտնի թենիսիստուհի Սերենա Ուիլյամսը պնդում էր, որ իր կյանքը կապելու է միայն սևամորթ տղայի հետ: Սակայն ամերիկահայ գործարարը գերեց աշխարհի առաջին ռակետի սիրտը:
Օհանյանի և Ուիլյամսի սիրավեպի մասին առաջին անգամ սկսեցին խոսել 2015 թվականին, երբ գործարարի սոցցանցի էջում սկսեցին հայտնվել Սերենայի մասնակցությամբ թենիսի մրցաշարերի լուսանկարները: Զույգը երկար ժամանակ թաքուն էր պահում իրենց կապ։ Այդ մասին նրանք բացահայտ սկսեցին միայն 2016 թվականի դեկտեմբերին:
Սեպտեմբերի 2-ին Ալեքսիսն ու Սերենան դուստր ունեցան, որին կոչեցին Ալեքսիս Օլիմպիա:
Միհրան Հարությունյան և Մակտինա Բեբիա
Հայ ըմբիշ, Ռիո դե Ժանեյրոյի 2016 թվականի Օլիմպիական խաղերի փոխչեմպիոն Միհրան Հարությունյանն ու աբխազ պարուհի Մակտինա Բեբիան ծանոթացել են 2017 թվականի հունվարին, Մոսկվայի ռեստորաններից մեկում:
Ինչպես հարցազրույցներից մեկի ժամանակ պատմել է Մակտինան, իր համար անակնակալ էր մարտ ամսին հայ ըմբիշի` իրեն արված ամուսնության առաջարկը:
«Մատանին նա վաղուց էր գնել: Ուզում էր նշանվել դեռ ապրիլին: Սակայն այդ երեկո նա մտափոխվեց և որոշեց ամուսնության առաջարկ անել: Միհրանը գնաց տուն մատանին վերցնելու, իսկ ընկերները գնացին ծաղիկների հետևից», — Sputnik Աբխազիային տված հարցազրույցում ասել է պարուհին:
Ռիոյի օլիմպիադայի և Եվրոպայի խաղերի արծաթե մեդալակիր Միհրան Հարությունյանի և պարուհի Մակտինա Բեբիայի շքեղ հարսանիքը տեղի ունեցավ Մոսկվայում, օգոստոսի 30-ին:
Գարիկ Մարտիրոսյան և Ժաննա Լևինա
Հայտնի շոումեն և հումորիստ Գարիկն ու Ժաննան ծանոթացել են 1997 թվականին, Սոչիում անցկացվող ՈՒՀԱ-ի ժամանակ: Գարիկի ապագա կինն այն ժամանակ երկրպագում էր իր մայր բուհի (Ստավրոպոլի պետական իրավաբանական համալսարանի) թիմին:
Ծանոթանալուց հետո Ժաննան մեկնել է իր հարազատ քաղաքը` քննաշրջանը հանձնելու։ Ավելի ուշ զույգը կրկին հանդիպել է և որոշել ամուսնանալ: Այսօր նրանք երկու երեխա են դաստիարակում` 13-ամյա Ժասմինին և 8 տարեկան Դանիելին:
Միխայիլ Գալուստյան և Վիկտորյա Շտեֆանեց
2003 թվականին Կրասնոդարի գիշերային ակումբներից մեկում են ծանոթացել ապագա ամուսիններ` հաղորդավար և հումորիստ Միխայիլ Գալուստյանն ու Վիկտորյա Շտեֆանեցը: Ծանոթությունը տեղի էր ունեցել Հաղթանակի օրը: Զույգն ամուսնացել է 2007 թվականի հուլիսի 7-ին: Վիկտորյան ազգությամբ մոլդովուհի է:
