ԵՐԵՎԱՆ, 4 հոկտեմբերի — Sputnik. Ռեժիսոր Ջո Բերլինգերը Հայոց ցեղասպանության մասին նոր ֆիլմ է նկարահանել, որն առաջին անգամ էկրան կբարձրանա նոյեմբերի 10-ին Նյու Յորքում և Լոս Անջելեսում։ Համաշխարհային պրեմիերան կկայանա Ռոբերտ Դե Նիրոյի հիմնած «Թրայբեկա» կինոփառատոնի ժամանակ։ Այս մասին հայտնում է deаdline.com կայքը։
«Վավերագրական լիամետրաժ ֆիլմը հիմնված է Թերի Ջորջի «Խոստումը» ֆիլմի հետազոտման վրա և ուղղված է Հայոց ցեղասպանությունը ժխտող քաղաքականության դեմ»,- նշված է կայքում։
«Ոչնչացնելու մտադրություն» ֆիլմը պատմում է 102 տարի առաջ Օսմանյան կայսրությունում տեղի ունեցած դեպքերի, ցեղասպանության զոհերի ու նրանց սերունդների մասին, որոնք պայքարում են, որ ԱՄՆ-ն ու մյուս երկրները ճանաչեն հայերի դեմ իրականացված ոճրագործությունը։ Ֆիլմում Բերլինգերը զրուցում է պատմաբանների, գիտնականների ու հայտնի կինեմատոգրաֆիստների հետ։ Ռեժիսորն ընդգծում է` Օսմանյան կայսրությունում իրականացված Հայոց ցեղասպանությունը մարդկության դեմ իրականացվող նոր հանցագործություններ ծնեց։
«Այս գործընթացի մի մասնիկը լինելը մեծ առավելություն է։ Մենք երկար ու համառ աշխատանք կտանենք, որպեսզի աշխարհին պատմենք անցյալում տեղի ունեցածի մասին, որպեսզի 1915 թվականի դեպքերի մասին իմանան աշխարհի բոլոր անկյուններում»,- ասել է Abramorama-ի նախագահ Ռիչարդ Աբրամովիչը, որը նույնպես մասնակցել է կինոնկարի ստեղծման աշխատանքներին։
Սերժ Թանկյանն ավելի վաղ Instagram-ի իր էջում հրապարակել էր Հայոց ցեղասպանության մասին պատմող նոր ֆիլմի թրեյլերը։
«Դիտեք Emmy-ի և Oscar-ի առաջադրված ռեժիսոր Ջո Բերլինգերի նկարահանած «Intent to Destroy: Death, Denial & Depiction» ֆիլմի թրեյլերը։ Կարելի է ասել` ամենաուժեղ ֆիլմերից մեկն է, որ ես տեսել եմ վերջին շրջանում»,- ասել էր նա։
Թանկյանը նշել էր, որ իրեն է տրվել ֆիլմի երաժշտությունը գրելու պատիվը։
