ԵՐԵՎԱՆ, 4 հոկտեմբերի — Sputnik, Արմենուհի Մխոյան. Գյումրիում սեպտեմբերի 1-ի դրությամբ, ըստ պաշտոնական տվյալների, կա մոտ 14 հազար աշխատանք փնտրող, նրանցից 11509-ն ունի գործազուրկի կարգավիճակ: Զարմանալի է, բայց միաժամանակ, կան շատ ընկերություններ, որոնք աշխատողի կարիք ունեն: Դա ոչ միայն բարձր տեխնոլոգիաների ոլորտի մասնագետներին է վերաբերում. պահանջված մասնագետները բոլոր բնագավառներից են՝ սպասարկման ոլորտից մինչև ՏՏ, շինարարությունից մինչև կրթություն:
Գյումրու քաղաքապետարանից վստահեցնում են՝ նույնիսկ բավական բարձր աշխատավարձով աղբատար մեքենաների վարորդ և սանմաքրման գծով բանվորների կարիք կա: Քաղաքում նաև մենեջերների, հավաքարարների, ջուլհակի ու քարտաշի բացը միշտ զգացվում է:
Երբեմնի արհեստավորների քաղաքում արհեստավոր չի մնացել՝ փաստում են գյումրեցիներն ու հավելում՝ լավագույները գնացել են արտագնա աշխատանքի այլ երկրներ, կամ, լավագույն դեպքում, Երևանում են աշխատում, իսկ Գյումրիում նույնիսկ շինարարի խնդիր կա:
Գյումրու քաղաքապետը այդ վիճակին այլ մեկնաբանություն է տալիս:
«Գործազրկության մասին պատկերացումն ուռճացրած է: Առաջարկներ կան, թող գնան ու աշխատեն, բայց չեն գնում: Մարդուն գործ ես առաջարկում՝ չի գնում: Կոշկակարին ասում ես՝ արի աշխատի, ասում է՝ տանս կարեմ բերեմ տամ քեզ»,- նշում է Սամվել Բալասանյանը՝ բերելով մեկ այլ օրինակ, արդեն ՝կապված շինարարության հետ.- «Գյումրու Ռուսթավելի փողոցի շինարարության համար ստիպված այլ տեղերից էինք աշխատողներ բերել: Գյումրին միշտ արհեստի ու արվեստի քաղաք է եղել, բայց այսօր մարդիկ չեն ուզում աշխատել»։
Քաղաքապետ նշում է, որ պատճառը կարող է ցածր աշխատավարձը լինել, կամ ընտանեկան նպաստից չեն ուզուն հրաժարվել:
SPUTNIK Արմենիայի անցկացրած հարցախույզը Գյումրիում վկայեց՝ առաջարկվող աշխատանքներ կա՛մ նեղ մասնագիտական հմտություն են պահանջում, կա՛մ շատ ցածր են վճարվում. այնքան, որ ավելի լավ է ոչինչ չանելով օգտվել ընտանեկան նպաստից, իսկ շատ դեպքերում գործազրկությունը երիտասարդների՝ մասնագիտական ոչ ճիշտ ընտրության հետ է կապված:
