ԵՐԵՎԱՆ, 4 հոկտեմբերի — Sputnik. Աշխարհահռչակ երգիչ և Շվեյցարիայում Հայաստանի դեսպան Շառլ Ազնավուրը պսակադրության կապակցությամբ շնորհավորել է Աշխարհի գավաթակիր Լևոն Արոնյանին ու նրա կնոջը` Արիանա Կաոիլիին։ Նամակը ֆեյսբուքյան իր էջում հրապարակել է Լևոն Արոնյանը։
«Շվեյցարայի Համադաշնությունում ՀՀ դեսպանության ողջ անձնակազմի և անձամբ իմ անունից սրտանց ու ջերմորեն շնորհավորում եմ Ձեր կյանքի այս կարևոր իրադարձության` պսակադրության կապակցությամբ»,- նշված է Ազնավուրի նամակում։
Նա մաղթել է, որ նորապսակների համատեղ կյանքը լի լինի համատեղ երջանկությամբ, անսպառ սիրով ու բազում-բազում հաղթանակներով։
Հայաստանի շախմատի հավաքականի առաջնորդ, Աշխարհի գավաթի կրկնակի չեմպիոն Լևոն Արոնյանն իր ապագա կնոջ` շախմատիստ Արիանայի հետ ծանոթացել է 1996 թվականին: Ֆիլիպինուհին, սակայն, միանգամից չի դարձել Լևոնի մուսան ու սիրելի կինը:
Նրանք սկսել են հանդիպել 2006 թվականից: Իսկ օրեր առաջ' սեպտեմբերի 30-ին, տեղի է ունեցել նրանց պսակադրության արարողությունը: Լևոնի և Արիանայի հարսանյաց հանդեսը հայկական ավանդույթներով է անցել: Քավորի դերում էլ հանդես է եկել ՀՀ նախագահ Սերժ Սարգսյանը:
