ԵՐԵՎԱՆ, 4 հոկտեմբերի — Sputnik. 2017-ի 9 ամիսների ընթացքում բյուջեի եկամուտներն աճել են 9,4%-ով, որը նախորդ տարվա նույն ցուցանիշի համեմատ 74 մլրդ դրամով ավելի է։ Այդ մասին այսօր լրագրողների հետ հանդիպմանը հայտնեց ՊԵԿ նախագահ Վարդան Հարությունյանը։
Ընդհանուր առմամբ, բյուջեի հարկային եկամուտներն այս տարվա հունվար–սեպտեմբեր ամիսներին կազմել է 860,5 մլրդ դրամ։
Բյուջեի եկամուտների ավելացումը Վարդան Հարությունյանը բացատրում է հարկային վարչարարության և ստվերի դեմ պայքարի արդյունքներով։ Հարկահավաքներին հաջողվել է ստվերից բյուջե վերադարձնել 2,2 մլրդ դրամ, որից 1,7-ը` իրավապահ մարմինների բացահայտումների արդյունքում։
Թե ովքեր են ստվերից դուրս բերված գործարարները և կան արդյո՞ք նրանց շարքում հայտնի գործարարներ՝ ՊԵԿ նախագահը չցանկացավ բացահայտել։
«Եթե ուզում եք ինձանից լսել որևէ գործարարի, խոշոր ձեռնարկությունում կատարված գործողության մասին տեղեկություն, ապա ասեմ` ինչպես նախկինում, այնպես էլ հիմա չեք լսելու, որովհետև մենք անում ենք մեր գործը և էժանագին PR–ով չենք զբաղվում»,– ասաց Վարդան Հարությունյանը։
Ինչ վերաբերում է նրան, թե ինչ կարգով են ընտրվում ռիսկային համարվող ձեռնարկությունները, Վարդան Հարությունյանը նշեց, որ ընտրում են ոչ թե հարկային մարմնի աշխատակիցները, այլ համակարգիչը` հատուկ չափորոշիչներով կազմված ծրագրի միջոցով։
Ի դեպ, Հայաստանյան տնտեսությունում առկա ստվերի ռիսկային ցուցանիշը կառավարությունը գնահատում է ամսական 2,8 մլրդ դրամի չափով։ ՊԵԿ նախագահն էլ խոստանում է` ստվերի կրճատման ցուցանիշներն առաջիկայում ավելի խոշոր չափերի են լինելու։
Ինչ վերաբերում է Հայաստանում գործող տնտեսվարողների թվի կրճատմանը, ՊԵԿ նախագահը չհերքեց մամուլում առկա տեղեկություններն այդ մասին։
«Փակված ձեռնարկությունների քանակով գուցեև բացասական բալանս ունենանք, բայց ակտիվ հարկատուների քանակը չի նվազել, այլ հակառակը, ավելացել է, որովհետև մենք ունենք ձեռնարկություններ, որոնք, թեև բացված են, բայց երբևիցե ակտիվ չեն եղել, չեն գործել»,- վստահեցրեց Վարդան Հարությունյանը։
Իսկ թե քանի և ինչ ձեռնարկություն է այս տարի դադարեցրել աշխատանքը, ՊԵԿ նախագահը չհրապարակեց, բայց ասաց, որ բյուջեն դրանից չի տուժել։
