ԵՐԵՎԱՆ, 5 հոկտեմբերի — Sputnik, Լաուրա Սարգսյան. Ամերիկյան օպերային գերաստղ Ռենե Ֆլեմինգին հիանալի տեսք և միշտ բարձր տրամադրություն են հաղորդում ճանապարհորդություններն ու սիրած աշխատանքը։ Այդ մասին Ֆլեմինգը պատմել է Երևանի «Զվարթնոց» միջազգային օդանավակայանում։
«Ես սիրում եմ ձեզ։ Նույնիսկ չգիտեմ, հավանաբար լավ տեսք ունենալ օգնում են ճամփորդություններն ու աշխատանքի նկատմամբ ունեցած հետաքրքրությունը», – ասել է Ֆլեմինգը` պատասխանելով Sputnik Արմենիայի թղթակցի հարցին։
Նրա խոսքով` երաժշտական տաղանդը նրան անցել է ծնողներից, որոնք մասնագիտությամբ երաժիշտներ էին և հիանալի երգում էին։ Աշխատասիրությունն ու հրաշալի կրթությունը երգչուհուն օգնել են զարգացնել իր մեջ եղած տաղանդն ու առաջ գնալ։
Ֆլեմինգը խոստովանեց, որ ուրախ է Հայաստանում գտնվելու համար, առավել ևս, որ սա նրա առաջին այցն է, նա հնարավորություն ունի տեսնելու նոր վայրեր, նոր երկիր։
«Եկել եմ տեսնելու ձեր Օպերան։ Կկատարեմ արիաներ Օթելլո, Ջրահարս և այլ օպերաներից», – պարզաբանեց աստղը։
Համաշխարհային ճանաչում ունեցող ամերիկյան օպերային երգչուհի, սոպրանո Ռենե Ֆլեմինգը հոկտեմբերի 7-ին համերգով հանդես կգա Սպենդիարյանի անվան օպերայի և բալետի ազգային ակադեմիական թատրոնում դիրիժոր Կոնստանտին Օրբելյանի ղեկավարած սիմֆոնիկ նվագախմբի հետ։ Համերգն անցկացվելու է «Երևանյան հեռանկարներ» միջազգային երաժշտական փառատոնի շրջանակներում, որը նվիրված է Երևանի օպերային թատրոնի 85-ամյակին։
Ռենե Ֆլեմինգը չորս անգամ արժանացել է «Գրեմմի» մրցանակին։
