ԵՐԵՎԱՆ, 8 հոկտեմբերի — Sputnik, Խաչիկ Չախոյան. Հոկտեմբերի 8-ին «Աստանա Արենա» մարզադաշտում Ղազախստանի հավաքականի հետ մրցավեճում Հայաստանի ընտրանին ավելի լավ խաղ ցուցադրեց առաջին կեսում, որում հաղթեց նվազագույն հաշվով: Ընդմիջումից հետո դաշտի տերերը առավելություն ունեին ու կարողացան խուսափել պարտությունից. խաղն ավարտվեց 1:1 հաշվով:
Այնպես չէ, որ մեր հավաքականն առաջին խաղակեսում խաղաց առանց վրիպումների: Բայց մերոնք նաև անհամեմատ շատ էին սպառնում մրցակցի դարպասին ու արժանիորեն առաջ անցան հաշվի մեջ: Մարկոս Պիզզելին հիանալի փոխանցումով հարվածի դուրս բերեց Հենրիխ Մխիթարյանին, ու մեր առաջատարը ցույց տվեց, թե նման իրավիճակներում ինչպես պետք է արդյունավետ հարված կատարել:
Ավելին, եթե մերոնք մի փոքր էլ հաջողակ լինեին, ապա ընդմիջման կգնային առնվազն երկու գնդակի առավելությամբ, որովհետև գոլային իրական պահեր էլի ունեցան: Ինչպես սպասվում էր, Ղազախստանի հավաքականը ընդմիջումից հետո ավելի ակտիվ ու ագրեսիվ էր գործում, և հանդիպման 61-րդ րոպեին դաշտի տերերը խփեցին պատասխան գնդակը:
Հանդիպման մնացած ժամանակահատվածում դարպասի գրավում այլևս չգրանցվեց, չնայած ինչպես և առաջին կեսում, այստեղ էլ վերջին վայրկյաններին կարող էինք կորզել հաղթանակը: Մենք մեկ միավոր վաստակեցինք, բայց ընտրական փուլն այնուամենայնիվ ավարտեցինք ոչ թե այս խաղի, այլ լեհերից կրած ծանր պարտության հիշողություններով:
Աշխարհի 2018 թվականի առաջնության ընտրական վերջին հանդիպումը մեր հավաքականի համար մարզական որևէ կարևորություն չէր ներկայացնում: Լեհաստանի հետ խաղը ձախողելուց հետո մեր հավաքականն ընդամենը ձգտել էր մոռանալ նախորդ խաղը ու հիշել, որ կարելի է նաև ավելի լավ ֆուտբոլ խաղալ:
Հոկտեմբերի 5-ին Լեհաստանի հավաքականից կրած ծանր պարտությունից հետո մեր հավաքականը նախևառաջ հոգեբանական աջակցության խնդիր ուներ: Մեր ընտրանու մեկնարկային կազմին ծանոթանալուց հետո պարզ դարձավ, որ Արթուր Պետրոսյանը հետևություններ է արել նախորդ խաղի համար հայտավորված կազմից ու համեմատած Լեհաստանի թիմի հետ խաղին մեր թիմի մեկնարկային կազմում ութ փոփոխություն էր կատարվել:
Հայաստանի հավաքականը անկախ այս խաղի արդյունքից խմբում արդեն հինգերորդ տեղով էր ավարտում մրցաշարը: Բայց ղազախներն էլ, անկասկած, ուզում էին ընտրական մրցաշարը հաղթանակով ավարտին հասցնել: Եվ ստացվեց շատ հետաքրքիր խաղ գոլային ու վտանգավոր պահերով հարուստ: Մեր հավաքականն, իրոք, շատ խնդիրներ ունի, որոնք արագ լուծման կարիք ունեն: Բայց այս խաղում մենք տեսանք, որ դեռ ամեն ինչ կորած չէ:
