ԵՐԵՎԱՆ, 9 հոկտեմբերի — Sputnik. Ջոն Մալկովիչի երազանքն է հասցնել անել այն ամենն, ինչ դեռ չի հասցրել։ Այդ մասին լեգենդար դերասանն ասել է Sputnik Արմենիային։
Նրա խոսքով` այդ միտքը նրան հետապնդում է ամենուր։
«Դուք ի նկատի չունեք, չէ՞, այն երազները, որոնք ես տեսնում եմ։ Եթե ոչ, ապա ես շատ եմ ցանկանում անել այն, ինչ չեմ հասցրել… Ես միշտ առաջ եմ նայում։ Եվ մտածում եմ, թե ինչ կցանկանայի անել ապագայում»,– խոստովանեց դերասանը։
Օրեր առաջ Մալկովիչը ելույթ էր ունենում Բելգիայի Գենտ քաղաքում։ Ելույթը հաջողակ է համարում, սակայն համերգի ժամանակ նրան չէր լքում այն միտքը, որ ինքն ու երաժիշտները կարող էին անել այնպիսի մի բան, որն իրենց ելույթն ավելի լավը կդարձներ։
«Նույնն է տեղի ունենում նաև գրքեր կարդալու ժամանակ։ Ես ապագայի ծրագրեր եմ կազմում։ Օրինակ, մոտ ժամանակներս կսկսեմ զբաղվել դիզայնով ինչպես նորաձևության ոլորտում, այնպես էլ ճարտարապետության»,– պատմեց Մալկովիչը։
Համագործակցություն երաժիշտների հետ
Բուենոս Այրեսում համաշխարհային ճանաչում ունեցող դերասանը հանդես եկավ Էռնեստո Սաբատոյի և Պաբլո Ներուդայի ստեղծագործությունների կատարմամբ` դաշնամուրի ու Ալֆրեդ Շնիտկեի լարային նվագախմբի ուղեկցությամբ։ Հայ հանդիսատեսը հոկտեմբերի 11-ին Արամ Խաչատրյանի անվան համերգասրահում կարող է ունկնդրել Մալկովիչի կատարմամբ Էռնեստո Սաբատոյի «Հերոսների և գերեզմանների մասին» վեպը։
Մալկովիչի խոսքով` հայ երաժիշտների հետ գործակցությունը սկսվեց այն պահից, երբ ծանոթացավ Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանի հետ։
«Երեք տարի առաջ ես աշխատում էի Սեուլում՝ Հարավային Կորեայում կամերային նվագախմբի հետ։ Այդ ժամանակ ես գործակցում էի ռուս երաժիշտների հետ, որոնք Շնիտկե էին նվագում (Կոնցերտ №3 դաշնամուրի և նվագախմբի համար)։ Այնտեղ` Սեուլում մենք հանդիպեցինք դիրիժոր Սերգեյ Սմբատյանի հետ»,– նշեց դերասանը։
Մալկովիչը երիտասարդական նվագախմբի ուղեկցմամբ ընթերցելու է արգենտինացի գրող Էռնեստո Սաբատոյի ստեղծագործությունները։
«Ինձ համար սա առաջին փորձը չէ սա. 8-րդ անգամն է։ Երաժշտությունն, ինքնին, բացառիկ ուժ ունի, հատկապես, դա վերաբերում է դասական երաժշտության կենդանի կատարմանը։ Այդ ժանրում ես համագործակցել եմ ամերիկացի կոմպոզիտոր Ֆիլիպ Գլասի հետ, երեք անգամ աշխատել եմ Վիեննայի Բարրոկո ոճում հանդես եկող նվագախմբի և իսպանացի կոմպոզիտոր Ալբերտո Իգլեսիասի հետ։ Մի քանի օր առաջ ավարտեցինք գործակցությունը ավստրիացի ջութակահար Ալեքսեյ Իգուդեսմանի հետ։ Այդ համագործակցությունն ինձ համար իրական հաճույք էր»,– ավելացրեց արտիստը։
Հայ լրագրողները հետաքրքրվեցին դերասանից, թե ինչ գիտի նա Հայոց ցեղասպանության մասին։ Մալկովիչի խոսքով` նրան միշտ զարմացրել է, թե ինչպես կարող են մարդիկ նման սարսափելի հանցագործություններ կատարել։
Մեգա-նախագիծ
Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը նշեց, որ փառատոնը կարելի է կայացած համարել, թեկուզ այն պատճառով, որ Հայաստան է ժամանել Ջոն Մալկովիչը։
«Դասական երաժշտության աշխարհում մենք կրկին բացում ենք այս մեգա-նախագիծը, կարծում եմ, որ սա ամպագոռգոռ հայտարարություն չէ»,– ավելացրեց դիրիժորը։
Հոկտեմբերի 11-ին Արամ Խաչատրյանի անվան համերգասրահում կմեկնարկի Խաչատրյանի անվան V միջազգային փառատոնը. համերգի բացմանը ելույթ կունենա հոլիվուդյան հայտնի լեգենդ Ջոն Մալկովիչը։
Խաչատրյանի անվան միջազգային փառատոնն այս տարի նվիրված է ծովանկարիչ Հովհաննես Այվազովսկու ծննդյան 200-ամյակին։ Փառատոնը կտևի մինչև դեկտեմբերի 11-ը, ծրագիրը խոստանում է լինել հագեցած և բազմազան. սիմֆոնիկ և կամերային համերգներ, պրեմիերաներ։
