ԵՐԵՎԱՆ, 10 հոկտեմբերի — Sputnik. Ֆրանսիայի խորհրդարանի պատգամավոր Դանիել Ղազարյանը մոտ ապագայում հաճույքով կայցելի Լեռնային Ղարաբաղ: Այս մասին նա հայտարարեց Երևանում:
Նրա խոսքով, աշխատանքային ժամանակացույցն է խանգարում, այլապես Ադրբեջանի սև ցուցակը չի կանգնեցնի կամ վախեցնի նրան:
Ղազարյանը նշեց, որ հայկական արմատներ ունեցող ֆրանսիացի պատգամավորների համար ղարաբաղյան հարցը կարևոր է: Նա ավելացրեց, որ Ֆրանսիայում հայ պատգամավորները ուշիուշով հետևել են անցյալ տարվա ապրիլյան դեպքերին:
«Այս անգամ ես եկել եմ Հայաստան քաղաքացիության հարցերով զբաղվելու համար: Երեկ ես հայկական անձնագիր ստացա: Անձնագիր ստանալուց հետո ես ինձ հայ եմ համարում և ֆրանսիացի պատգամավոր, որը ներկայացնում է նաև Հայաստանը», — ասաց նա:
Մասնավոր այցը դարձավ հրապարակային: Ղազարյանին Ազգային ժողովում ընդունեց Հայաստանի խորհրդարանի խոսնակ Արա Բաբլոյանը: Նա հանդիպեց նաև ՀՅԴ «Դաշնակցություն» խորհրդարանական խմբակցության քարտուղար Աղվան Վարդանյանի հետ:
«Մենք քննարկել ենք տարբեր թեմաներ, սակայն հիմնականում դրանք Հայաստանի և Ֆրանսիայի միջև հարաբերությունների ամրապնդման հետ կապված հարցեր էին: Իհարկե, մեր երկրների միջև կապերը միշտ ամուր են եղել, և ես ուրախ եմ, որ 2018 թվականին Ֆրանկոֆոնիայի գագաթնաժողովը տեղի կունենա Երևանում», — ասաց պատգամավորը:
Խոսելով Ֆրանսիայի հայ համայնքի մասին` Ղազարյանն ընդգծեց համախմբվածությունն ու ուժը:
«Ֆրանսիայի հայ համայնքն ուժեղ է, այնտեղ մենք եկեղեցիներ ուենքն, և հայ պատգամավորների համար կարևոր է իրենց արմատների պահպանումը: Դա հատկապես կարևոր է նոր սերնդի համար»: Մեր երկրների միջև միշտ եղել է մշակութային կապ»,- ընդգծեց պատգամավորը:
Ըստ քաղաքական գործչի` քաղաքական կշիռ ձեռք բերելու համար Հայաստանը պետք է տնտեսապես զարգանա: Սա, ըստ նրա, շատ կարևոր է, որպեսզի երիտասարդները չլքեն հայրենիքը:
