ԵՐԵՎԱՆ, 10 հոկտեմբերի — Sputnik. Մինչև հիմա հայաստանյան համայնքներն իրենց բյուջեի միայն 5%-ն էին ծախսում կապիտալ ներդրումների համար, մնացածը ծախսվում էր պահպանման ծախսերի և աշխատավարձերի համար, բայց շուտով վիճակը փոխվելու է։ Այսօր լրագրողների հետ հանդիպմանը նման վստահություն հայտնեց ՀՀ տարածքային կառավարման և զարգացման նախարար Դավիթ Լոքյանը։ Իսկ որպեսզի համայնքների ղեկավարները սովորեն ճիշտ կառավարել իրենց բյուջեն, նախարարությունում նրանց համար ծրագրային բյուջետավորման անցնելու ձեռնարկ է մշակվել։
«Համապատասխան ծրագրում պետք է ֆիքսվեն այն չափելի ցուցանիշները, որոնք պետք է լինեն տարվա վերջում և նոր համապատասխան ֆինանսական պահանջ դնեն տվյալ համայնքում։ Ենթադրենք, պետք է ջրագիծ կառուցել, դրա համար պետք է տեսնենք, թե ինչպես է այն կառուցվելու, քանի գյուղացի է դրանից օգտվելու, ինչ տնտեսական աճ է բերելու դա, աղքատությունը կրճատվելու է, թե ոչ, նոր հավանություն տալ», — նշեց Լոքյանը` հավելելով, որ նախարարությունն էլ իր հերթին է ուժեղացնելու հսկողությունը համայնքային ծախսերի նկատմամբ։
Միաժամանակ, գործադիրը շարունակում է իրականացնել համայնքների խոշորացման ծրագիրը, ինչը, հեղինակների համոզմամբ, կնպաստի նաև ֆինանսական խնդիրների լուծմանը։ Դավիթ Լոքյանի խոսքով, արդեն իսկ խոշորացված համայնքներում բազմաթիվ ծրագրեր են իրականացվում, որոնք նախկինում հնարավոր չէին։
«Օրինակ՝ Դիլիջանում, ԵՄ օժանդակությամբ և պետության մասնակցությամբ 6 ավտոբուս է տրամադրվել, որոնք համայնքի բոլոր մասերը կապում են Դիլիջանի հետ, ինչպես նաև կանգառ և ծածկված շուկաներ»,- ասաց Լոքյանը։
325 համայնքի միավորման արդյունքում արդեն իսկ ձևավորվել է 34-ը։ Մինչև տարեվերջ նախատեսված է դրանց թիվը հասցնել 52-ի։ Ծրագիրը շարունակվելու է նաև 2018-2019 թվականներին։
Խոշորացված համայնքներում առաջիկայում ներդրումներ են իրականացվելու նաև ԵՄ-ի տրամադրած ֆինանսավորմամբ։
Լոքյանը լրագրողներին հայտնեց, որ նոյեմբերի 13-ին Բրյուսելում նախանշված է ՀՀ-ԵՄ Համապարփակ և ընդլայնված գործընկերության համաձայնագրի ստորագրումը, որով Հայաստանին կտրամադրվի 26 մլն դոլար` համայնքներում տնտեսական ծրագրերի, 54 մլն` փոքր ու միջին ձեռնարկությունների զարգացման համար։
