ԵՐԵՎԱՆ, 11 հոկտեմբերի — Sputnik. Հայաստանի գյուղատնտեսությունն ունի զարգացման մեծ ներուժ, բայց նաև բազում խնդիրներ, որոնք առայժմ խոչընդոտում են զարգացումը։ Այս մասին այսօր լրագրողների հետ հանդիպմանն ասաց ՀՀ գյուղնախարար Իգնատի Առաքելյանը։
Հիմնական խնդիրներից նախարարը հիշատակեց գյուղտեխնիկայով հագեցվածության ցածր մակարդակը, ոռոգման համակարգի ոչ լիարժեք ապահովվածությունը, բնակլիմայական աղետներից անպաշտպան ու չապահովագրված լինելը, կրթական ու խորհրդատվական ծառայությունների ցածր մակարդակն ու բացակայությունը, ինչպես նաև` գյուղմթերքի իրացման գների և գյուղացիների վճարումների ոլորտում առկա բացերը։
Խնդիրները շատ են, բայց, նախարարը լիահույս է, որ կառավարության առաջարկած լուծումներով հնարավոր կլինի 2-3 տարի հետո առաջընթաց գրանցել։
«Մենք ապահովել ենք և՛ բյուջեով նախատեսված ծրագրերը, և՛ զուգահեռ նոր 3 ծրագիր ենք սկսել: Լիզինգի ծրագրով մենք այս տարի 132 միավոր գյուղտեխնիկա ենք տրամադրել, հիմնվել է գյուղտեխնիկայի մեկ կայան: Հայտարարել ենք պետական աջակցության գյուղտեխնիկայի կայանի հիմնումը, որի մրցույթ ավարտվել է»,– ասաց նա։
Նախարարի խոսքով` մի քանի ամսից ՀՀ-ն կստանա գյուղտեխնիկան, որը կսկսի գործել գարնանային աշխատանքների հետ:
«Համաշխարհային բանկի ծրագիր կա՝ արոտների ջրային համակարգի արդիականացման, անասնապահական կոոպերատիվների հիմնման և աջակցման ծրագիրը, որով մինչև տարվա վերջ կտրամադրենք ևս 120 միավոր գյուղտեխնիկա»,- ասաց Առաքելյանը։
Կառավարության նախաձեռնած ծրագրերի ժամկետը, գյուղնախարարի խոսքով, 2-3 տարի է։ Դրանց ավարտին միայն, նրա համոզմամբ, կստեղծվի գյուղատնտեսության զարգացման ցանկալի համակարգը։
Իսկ այս տարվա դրական տեղաշարժը, Իգնատի Առաքելյանի խոսքով, բերքի` առանց խնդիրների ընթացող մթերումն է։ Իսկ որպեսզի մթերող ընկերությունները չուշացնեն գյուղացիների վճարումները, կառավարությունը նրանց էժան վարկեր է առաջարկում կամ, ինչպես նախարարն է որակում. ձրի փող։
«Վարկերը 3%-անոց են։ Այդքան ցածր տոկոսադրույք աշխարհում ոչ մի տեղ չկա։ Մենք գրեթե անվճար ենք տալիս, որովհետև ինֆլյացիան շուրջ 3% է հայտարարված, այսինքն` մենք տալիս ենք ավելի ցածր, քան ինֆլյացիան է»,- ասաց Առաքելյանը։
Նա չբացառեց, որ կառավարության այս նախաձեռնությունը տնտեսապես գուցե սխալ է, բայց դրանով գործադիրը փորձում է գյուղատնտեսությունը դարձնել գրավիչ։
