ԵՐԵՎԱՆ, 12 հոկտեմբերի — Sputnik. Մինչև 30 տարեկան երիտասարդ մայրերին կառավարության աջակցությամբ գործատուները կտրամադրեն վերապատրաստման կուրսեր։ Որոշման նախագծին այսօր հավանություն տվեց վարչապետ Կարեն Կարապետյանը։
Որպեսզի երիտասարդ մայրերը մասնագիտություն ունենան, կառաջարկվի նաև 6-ամսյա կրթաթոշակ։ Պետությունը կվճարի այն ընկերությունների աշխատակիցներին, որոնք համաձայն կլինեն ստանձնելու այդ գործը։ Այդ աշխատակիցները կստանան իրենց աշխատավարձի 20 տոկոսի չափով հավելավճար։
Ծրագրում ընդգրկվող կանայք սկզբնական շրջանում կլինեն հարյուրը։ Կես տարի նրանք կստանան ամսական 78 հազար դրամ աշխատավարձ։ Ծրագիրը կմեկնարկի 2018 թվականից։
