ԵՐԵՎԱՆ, 16 Հոկտեմբեր — Sputnik. Դոնիռոստովցի Յուլյա Մանուչարյանը, որն ի ծնե ամբիդեքստրիա ունի (կարողանում է հավասարապես օգտագործել երկու ձեռքերը) ապշեցրել է ռուսական առաջին ալիքով հեռարձակվող և բացառիկ ունակություններ բացահայտող «Ես կարող եմ» հեռուստաշոուի հայտնի հաղորդավար Լեոնիդ Յակուբովիչին։
Փոքր տարիքում Յուլյան ձախլիկ է եղել, սակայն առաջին դասարան գնալուց առաջ ծնողները նրան հետ են վարժեցրել, և այժմ նա նույնքան լավ կարողանում է գրել ինչպես աջ, այնպես էլ ձախ ձեռքով, բացի այդ նա լեզուների նկատմամբ առանձնակի հակում և լավ հիշողություն ունի։
Շոուի ընթացքում նա շրջանակի մեջ դրված ապակու վրա միաժամանակ երկու ձեռքերով գրեց Ալեքսանդր Պուշկինի «Հիշում եմ դյութիչ պահն այն» բանաստեղծությունը` հորիզոնական, ուղղահայաց և թիթեռնիկի տեսքով։
Հեռուստաշոուի ժամանակ նրան խնդրեցին «ես քեզ սիրում եմ» արտահայտությունը փակ աչքերով գրել տարբեր լեզուներով։
Հաղորդավար Լեոնիդ Յակուբովիչը պարզապես ցնցված էր։
«Բարեկամս, մենք էլ որոշ բաներ կարող ենք անել, և միաժամանակ երկու ձեռքով ձեզ եմ հանձնում 50 հազար ռուբլի», — ասել է նա։
Յուլյան որպես մրցանակ դրամական պարգև ստացավ։
