ԵՐԵՎԱՆ, 17 հոկտեմբերի — Sputnik. Ուկրաինայի Ուժգորոդ քաղաքում կոշիկի արտադրամասի սեփականատեր 54-ամյա հայ գործարարը սպանվել է սեփական աշխատասենյակում, նրա վրա հրազենի մի քանի կրակոց է արձակվել, հայտնում է «Մոսկովսկի կոմսոմոլեցը»: Տեղական ոստիկանության տվյալներով՝ մինչև կրակոցները հարձակվողի ևզոհի մեջ վեճ է տեղի ունեցել:
«Հոկտեմբերի 16-ին, մոտավորապես ժամը 11-ին է սպանվել «Ապարան» ՓԲԸ-ի գլխավոր տնօրեն 54-ամյա Անդրանիկ Նիկողոսյանը»,-գրում է պարբերականը:
Սպանության դրդապատճառը դեռ հայտնի չէ: Անդրանիկ Նիկողոսյանի գլխավոր մենեջերը ձերբակալվել է, նրան ոստիկանության քաղաքային բաժնում հարցաքննում են:
Սպանվածը՝ Անդրանիկ Հովհաննեսի Նիկողոսյանը, ծնունդով Ապարանից է: Նա եղել է Ուկրաինայի Մերձկարպատների մարզի Հայերի միության ներկայացուցիչը:
Դեպքի առթիվ հարուցվել է քրեական գործ:
