ԵՐԵՎԱՆ, 18 հոկտեմբերի — Sputnik. Հայուհի Լեյլա Ամիրբեկյանը ռուսական Առաջին ալիքի եթերով հեռարձակվող «Ես կարող եմ» բացառիկ տաղանդներ բացահայտող շոուի ժամանակ իր ուժով գերել է ռուս հանդիսատեսին ։
Լեյլան ծնվել է Վրաստանում՝ հայկական ընտանիքում։ Փոքր տարիքում ծնողները փորձել են նրան հեռու պահել սպորտից և դաստիարակել են որպես տնային տնտեսուհի։
«Ծնողներս միշտ ինձ դաստիարակում էին որպես տնարար աղջիկ, սակայն իմ մեջ փոքրիկ «տղա» էր արթնանում, որը միշտ ձգտում էր սպորտի։ Դպրոցական տարիներին ես փամփլիկ աղջնակ էի, այդ պատճառով երազում էի ձիգ որովայն ունենալ»,– ասել է աղջիկը։
Նրա խոսքով` կարելի է զբաղվել ուժային մարզաձևերով` չկորցնելով կանացիությունը։ Ինչպես ասաց Լեյլան, նրան «գերել է» ուժային էքստրիմը։
69 կգ քաշ ունեցող աղջիկը, ռեկորդ է սահմանել` ուսերի վրա բարձրացնելով միմյանց ամրացված դույլեր, որոնց վրա նստած էին մոտ 300 կգ քաշով երեխաներ և այդպես քայլել է 5 մետր։
Ընդ որում՝ հաղորդավար Լեոնիդ Յակուբովիչն ասել է, որ չէր հավատում, թե նման բան հնարավոր է, սակայն Լեյլա Ամիրբեկյանը համոզեց նրան։
