Այս հանգստյան օրերին Երևանի քաղաքապետարանը հյուրընկալել է «Խելացի քաղաք» ծրագրավորողների մրցույթը: Միջոցառման ընթացքում շուրջ 70 ծրագրավորող 24 ժամվա ընթացքում ներկայացնելու է իր առաջարկած լուծումները տեղեկատվական տեխնոլոգիաների միջոցով քաղաքային տնտեսության տարբեր ոլորտներում, հատկապես շենքերի կառավարման, զբոսաշրջության զարգացման և քաղաքի մաքրության հարցերում:
«Մենք ունենք հրաշալի երիտասարդներ, ովքեր այս ոլորտում կարող են օգտակար լինել, և սա էլ հրաշալի հարթակ է նրանց համար, որ ներկայացնեն իրենց մոտեցումներն ու առաջարկությունները՝ խելացի քաղաք տեսլականը զարգացնելու համար»,- ասել է Երևանի քաղաքապետ Տարոն Մարգարյանը:
Նա վստահեցրել է, որ մրցույթի լավագույն աշխատանքները, որոնք կլինեն հետաքրքիր և իրագործելի, տեղ կգտնեն քաղաքի կառավարման ծրագրերում:
