ԵՐԵՎԱՆ, 23 հոկտեմբերի — Sputnik. Տատյանա Դանիլյանցի «Վեց երաժիշտ` քաղաքի ֆոնին» ռուս-հայկական կինոժապավենը Նյու Յորքի RusDocFilmFest վավերագրական ֆիլմերի փառատոնում դիպլոմ է ստացել օպերատորական լավագույն աշխատանքի համար:
Ֆիլմը ներկայացնում է ականավոր երաժիշտների պատմությունը` նախկին Խորհրդային Միության երաժշտական մայրաքաղաքներից մեկի `Երևանի ֆոնին: ԽՍՀՄ-ի փլուզումից հետո, վերապրելով պատերազմը, մութ ու ցուրտ տարիներն ու գրեթե լիակատար մեկուսացումը, քաղաքն իր տեղն է փնտրում աշխարհում:
Ֆիլմի գլխավոր հերոսներն են «Գրեմմի» և World Music Award-ի երաժշտական մրցանակների դափնեկիր, «Armenian Navy Band» լեգենդար խմբի հիմնադիր Արտո Թունջբոյաջյանը, դուդուկի վարպետ Ջիվան Գասպարյանը, սիրված ջազմեն Լևոն Մալխասյանը և այլ նշանավոր կատարողներ:
Ֆիլմում երաժիշտները խոսում և երգում են իրենց սիրելի քաղաքի մասին` ընդգծելով Երևանի գեղեցկությունն ու թաքնված ցավը:
