ԵՐԵՎԱՆ, 23 հոկտեմբերի — Sputnik. Գլենդելի միջազգային կինոփառատոնում «Տարվա դերասան» մրցանակին է արժանացել հագուստի դիզայներ, ամերիկաբնակ դերասան Միքայել Շարաֆյանը: Փառատոնն անցկացվել է հոկտեմբերի 13-22-ը։
«Երբեք չէի մտածի, որ «Լավագույն դերասան» մրցանակին կարժանանամ «Հարսնացուն Վեգասից» ֆիլմի գլխավոր դերի համար»,- գրել է նա ֆեյսբուքյան իր էջում:
Միքայելը նաև նշել է, որ սա իր կյանքում և կարիերայում իսկապես պատմական պահ է:
«Դերասանությունն, իհարկե, իմ մասնագիտությունը չէ, բայց ես այն անվանում եմ «Հագուստ ձևավորողի մեթոդ»: Հիմա ես գիտեմ, թե ինչ է նշանակում դերասան լինելը»,- գրել է նա:
Sputnik Արմենիայի թղթակցի հետ զրույցում Շարաֆյանը նշեց, որ սա իր առաջին դերն է եղել։ «Հարսնացուն Վեգասից» ֆիլմում Շարաֆյանի հետ հանդես է եկել ամերիկացի դերասանուհի Շարլին Ռոուզը:
Միքայել Շարաֆյանը 2011 թվականին Լոս Անջելեսում կայացած Հոլիվուդյան կինոփառատոնում հաղթել է «Հագուստի լավագույն դիզայներ» անվանակարգում Disasteroid տեսահոլովակի համար:
