ԵՐԵՎԱՆ, 24 հոկտեմբերի — Sputnik. Հայաստանի և Ռուսաստանի միջև ապրանքաշրջանառությունը 2017 թվականի ութ ամսվա ընթացքում ավելացել է 30 տոկոսով, Երևանում Կարեն Կարապետյանի հետ հանդիպման ժամանակ ասաց ՌԴ վարչապետ Դմիտրի Մեդվեդևը։
Ընդ որում` ՀՀ վարչապետը Մեդվեդևից առաջ այլ թիվ ներկայացրեց` նշելով, որ այդ թիվը կազմել է 23,5%։
«Մեր երկրների միջև ապրանքաշրջանառությունն աճում է։ Առաջին 8 ամսվա ընթացքում ապրանքաշրջանառությունն ավելացել է 23.5 տոկոսով»,- ասաց Կարապետյանը։
Նրա խոսքով, աճի հնարավորություններն ավելի մեծ են, ներուժը` շատ։ Զարգացման համար պոտենցիալ ուղղություններ են մշակվում։
Կարապետյանը նշեց, որ կողմերը պատրաստվում են փաստաթղթեր ստորագրել, որոնք թույլ կտան ավելի ամրապնդել երկկողմ հարաբերությունները։ Նրա խոսքով, կապերը խորացնելու բոլոր հնարավորությունները կան։
Դմիտրի Մեդվեդևն էլ հայտարարեց, որ ինքն ապրանքաշրջանառության վերաբերյալ այլ ցուցանիշներ ունի։
«Իմ թիվն ավելի լավն է, քան ձերը։ Հունվարից օգոստոս ընկած ժամանակահատվածում ապրանքաշրջանառությունն ավելացել է 30 տոկոսով։ Ես առաջարկում եմ այս թիվն օգտագործել»,- ասաց Մեդվեդևը։
Նրա խոսքով, տնտեսական դժվարությունների շրջանը հաղթահարված է, ապրանքաշրջանառության ծավալները վերականգվում են։ Նա հույս հայտնեց, որ ներդրումային համագործակցությունն էլ հետ չի մնա։
Մեդվեդևը նշեց, որ վերջին ժամանակաշրջանում կողմերը ոչ միայն երկկողմ, այլև բազմակողմանի համագործակցություն են իրականացնում ԵԱՏՄ շրջանակում։ Նրա խոսքով, ամեն ինչ վկայում է, որ ճիշտ ուղի է ընտրվել։
«Խոսքը վերաբերում է Հայաստանից Ռուսաստան գյուղմթերքի մատակարարմանը և մյուս ուղղություններին»,- ասաց Մեդվեդևը։
Կարապետյանն իսկույն արձագանքեց` նշելով, որ, անշուշտ, հակված է օգտվել Մեդվեդևի ներկայացրած վիճակագրությունից։
Նա նույնիսկ կատակեց. «Կասկածներ կան, որ Հայաստանի վիճակագրական ծառայությունը որոշ տվյալներ նվազեցնում է»։
