ԵՐԵՎԱՆ, 25 հոկտեմբերի — Sputnik. Հայկական և ռուսական կողմերը քննարկում են ռուսական Sukhoi Superjet 100 (SSJ100) ինքնաթիռների հենքով Հայաստանի ազգային ավիափոխադրող ունենալու հարցը, հայտնում է ՌԴ տրանսպորտի նախարարության մամուլի ծառայությունը։
Գերատեսչության ղեկավար Մաքսիմ Սոկոլովը նախօրեին մասնակցեց ՌԴ վարչապետ Դմիտրի Մեդվեդևի հայաստանյան այցի շրջանակներում կազմակերպած միջոցառումներին։
«Նախարարը տեղեկացրեց, որ Ռուսաստանի արդյունաբերության և առևտրի նախարարությունը աշխատանքներ է տանում Հայաստանում ռուսական Sukhoi Superjet 100 հենքով ազգային ավիափոխադրող ունենալու նախագծի վերաբերյալ»,– նշված է հաղորդագրության մեջ։
Ավելի վաղ Ռուսաստանի արդյունաբերության և առևտրի նախարարության ղեկավար Դենիս Մանտուրովը նշել էր, որ ռուսական կողմը կարող է Հայաստան տեղափոխել ոչ ավել, քան 10 Sukhoi SuperJet 100 ինքնաթիռ։ Առավելագույնը չորս օդանավերի տեղափոխումը կարող է իրականացվել մինչև 2019 թվականը։
SSJ-100 առաջին ինքնաթիռը «Արմավիա» հայկական ավիաընկերությունը ձեռք էր բերել 2011 թվականին։ Մեկ տարի հետո նախատեսվում էր ձեռք բերել նման երկրորդ ինքնաթիռը, սակայն «Արմավիան» ստիպված էր հրաժարվել գործարքից ֆինանսական խնդիրների պատճառով։ 2012 թվականի օգոստոսին ավիաընկերությունը Ռուսաստանին վերադարձրեց նաև առաջին ինքնաթիռը։
