ԵՐԵՎԱՆ, 29 հոկտեմբերի — Sputnik, Անի Լիպարիտյան. «Ձայնը 6» ռուսական երաժշտական նախագծի մասնակից Դիանա Շալջյանը Sputnik Արմենիայի հետ զրույցում խոսեց իր հույզերի, Լեոնիդ Ագուտինի հետ աշխատելու և ապագա ծրագրերի մասին։
Սկսնակ երգչուհին նշեց, որ շոուն իրեն անմոռանալի հույզեր է պարգևել ու ստիպել է հավատալ սեփական ուժերին:
Երաժշտությունը` կյանքի ուղեկից
Դիանայի մայրիկը նույնպես երաժշտությամբ է զբաղվում, և հենց նա է որոշել չորս տարեկան դստերը արվեստների գիմնազիա տանել:
«Մայրիկս ուզում էր հասկանալ, թե ինչն է ինձ ավելի հոգեհարազատ: Բոլոր ուղղություններից ամենահարմարը երաժշտական թատրոնն էր, այնպես ստացվեց, որ ես սկսեցի բեմում հանդես գալ շատ փոքր տարիքից: Եվ երբ մեծացա, արդեն պարզ էր, թե ինչով եմ զբաղվելու հետագայում», — ասաց Դիանան:
Այսօր ուրախությամբ է մասնակցում ռուսական «Ձայնը» նախագծին, բայց խոստովանում է, որ դա իր համար լուրջ փորձություն էր:
«Կույր լսումների օրը ես շատ էի հոգնել և նույնիսկ հույս չունեի, որ ինչ-որ մեկը կշրջվի իմ կողմ… Կարելի է ասել, որ ես կարծես երազի մեջ լինեի, և երբ առաջին վայրկյաններից շրջվեցին ժյուրիի անդամները, ես միաժամանակ և՛ զարմացա, և՛ ուրախացա: Արտասվեցի զարմանքից: Ես զգացմունքային մարդ եմ, չեմ սահմանափակում գործողություններս և չեմ ամաչում դրանից», — ասաց երգչուհին:
Ագուտինի և «Ձայնը» նախագծի մասին
Խոսելով իր մարզչի` երգիչ և կոմպոզիտոր Լեոնիդ Ագուտինի մասին` Դիանան նշեց, որ նրանք այնքան հաճախ չեն պարապում, որքան կցանկանար, բայց նման երաժիշտի հետ շփվելն արդեն մեծ հաճույք է:
Նրա խոսքով` Ագուտինին հաջողվել է լավ թիմ հավաքել:
«Ես շփվում եմ բոլորի հետ, մեր թիմի բոլոր մասնակիցներն ընկերացել են: Թիմը բազմազգ ստացվեց», — նշեց Դիանան:
Երգչուհին կարծում է, որ նախագծին մասնակցելը, նախևառաջ, անհավանական հնարավորություն է արտիստի համար ամբողջ աշխարհում լսելի դառնալու համար:
Իսկ ահա Դիանայի մրցութային երգը բավականին «ռիսկային» էր, աղջիկը համոզված չէր` արդյոք այն դուր կգա ժյուրիի անդամներին, թե ոչ:
«Ես հաստատ գիտեի, որ Spain-ը (Chick Korea) դժվար ինչ-որ մեկը որոշի կատարել նախագծում, մի փոքր մտավախություն կար` ինչպես ժյուրիի անդամները կգնահատեն այն: Սակայն, իհարկե, ինձ ուրախացրեց այն փաստը, որ նրանց ծանոթ էր այդ երգը», — խոստովանեց «Ձայնը» նախագծի մասնակիցը:
Դիանան ելույթ է ունենում տարբեր բեմերում, երգում է ջազ և սոուլ, խոստովանում է, որ իր համար սիրո լեզուն իսպաներենն է:
Իմ Հայաստան
Դիանայի երգացանկում քիչ են հայկական երգերը: Նա իր գիտակցական կյանքն անցկացրել է Ռուսաստանում, հայերեն չգիտի, բայց պատրաստվում է ուղղել «սխալը»։
«Հայերեն երգեր քիչ գիտեմ, բայց ամեն տարի համալրում եմ երգացանկս նորերով: Ցավոք, մայրենի լեզվին ընդհանրապես չեմ տիրապետում, սակայն պատրաստվում եմ այս տարի լեզվի դասընթացների հաճախել», — նշեց Դիանան:
Երգչուհին առաջին անգամ Հայաստան է այցելել երեք տարի առաջ, նրան շատ է դուր եկել պատմական հայրենիքը և երազում է այստեղ տուն գնել:
«Իհարկե, ես դեմ չէի լինի համերգ տալ Հայաստանում, բայց այժմ աշխատում եմ հեղինակային երգերի վրա, որպեսի ներկայացնելու բան ունենամ», — ասաց նա:
Դիանան ավելացրեց, որ մոտ ապագայում կթողարկի առաջին ալբոմը:
