ԵՐԵՎԱՆ, 1 նոյեմբերի — Sputnik. Չի բացառվում, որ հաղորդավար Անդրեյ Մալախովի կյանքում խնդիրներ ծագեն, քանի որ նրա վարած հաղորդաշարի ընթացքում ներկայացվել են Արմեն Ջիգարխանյանի գրասենյակում տեղադրված գաղտնի տեսախցիկների տեսագրությունը։ Այս մասին հայտնում է Life-ը։
Տեսախցիկների (որոշ տվյալներով` մի քանի տեսախցիկ են տեղադրել) նկարահանած կադրերը ցուցադրվել են Անդրեյ Մալախովի «Ուղիղ եթեր» հաղորդման ընթացքում։
Life-ի տվյալով` իրավապահ մարմինների աշխատակիցները պատրաստվում են ստուգել և պարզել, թե ինչպես են այդ կադրերը հայտնվել Մալախովի «ձեռքում»։
Ավելի վաղ հայտնի էր դարձել, որ անհայտ անձինք Ջիգարխանյանի գրասենյակում տեսախցիկներ ու գաղտնալսման սարքեր են տեղադրել, ինչի առթիվ քրեական գործ է հարուցվել։
ԶԼՄ-ների տվյալով` տեսախցիկները կարող էին դերասանի սենյակում հայտնվել նրա կնոջ` Վիտալինա Ցիմբալյուկ-Ռոմանովսկայայի աջակցությամբ։
Ջիգարխանյանը ֆինանսական սկանդալի պատճառով նոյեմբերի 9-ին պաշտոնապես կբաժանվի իր կնոջից` Վիտալինա Ցիմբալյուկ-Ռոմանովսկայայից: Հայտնի է, որ Ցիմբալյուկը լքել է Ռուսաստանը: ԶԼՄ-ների հաղորդումների համաձայն` Ջիգարխանյանի կինն իր մոր հետ մեկնել է Թբիլիսի, սակայն, ամենայն հավանականությամբ, երթուղին ավելի ուշ կփոխվի: Որոշ տեղեկությունների համաձայն` նա կարող է գնալ Կիև, քանի որ Ցիմբալյուկն Ուկրաինայի քաղաքացիություն ունի:
Այժմ Ջիգարխանյանն ապրում է երեք սենյականոց վարձակալած բնակարանում, որը նրան օգնել են գտնել ընկերները:
Արմեն Ջիգարխանյանը և Վիտալինա Ցիմբալյուկ-Ռոմանովսկայան միասին ապրել են ավելի քան տասնհինգ տարի, բայց պաշտոնապես ամուսնացած են միայն մեկուկես տարի։
Հիշեցնենք, որ կնոջ հետ տեղի ունեցած կոնֆլիկտից հետո Ջիգարխանյանը հոկտեմբերի 10-ին հայտնվել էր Մոսկվայի 57-րդ քաղաքային հիվանդանոցում, որտեղ մնաց ավելի քան տասը օր: Հիվանդանոցում նա ասում էր, որ չգիտի, թե ուր է գնալու, քանի որ ամբողջ գույքը վերագրանցել է կնոջ անունով: Այժմ իրավապահ մարմինները հետաքննում են Ջիգարխանյանի անձնագրի գողության փաստը:
