ԵՐԵՎԱՆ, 2 նոյեմբերի — Sputnik. Պետք չէ անընդհատ հարցնել, թե 2018 թվականին ով է վարչապետ դառնալու, այսօր լրագրողների հետ հանդիպման ժամանակ ասաց Կարեն Կարապետյանը։
Հիշեցնենք, որ 2018 թվականի ապրիլի 9-ին Հայաստանը նոր նախագահ կունենա, որի լիազորությունները խիստ կկրճատվեն, իսկ վարչապետի դերը կմեծանա ։
«Բազմաթիվ անգամ հնչել է հարցը, թե ով է զբաղեցնելու այդ պաշտոնը։ Ստիպված եմ նորից պատասխանել` ՀՀԿ-ն առաջադրելու է վարչապետի թեկնածու մեր կոալիցիոն գործընկերոջ հետ: Մենք նման քննարկում չենք ունեցել, այդ իսկ պատճառով որևէ պայմանավորվածության մասին խոսելն ապարդյուն է»,- ասաց Կարապետյանը։
Վարչապետն անդրադարձավ նաև Սերժ Սարգսյանի դերակատարմանը` նշելով, որ նա մեծ ներդրում ունի երկրի կյանքում։ Կարապետյանի խոսքով` երկրի ղեկավարը հանրապետության անվտանգության երաշխավորն է։
«Ես հստակ հայտարարել եմ, որ պատրաստ եմ աշխատել։ Ի՞նչ եմ ուզում անել։ Ուզում եմ ծառայել մեր երկրին», — ասաց վարչապետը։
Կարապետյանը նշեց նաև, որ հետագայում այլևս չի պատասխանելու նմանատիպ հարցերին։