ԵՐԵՎԱՆ, 3 նոյեմբերի — Sputnik. Տրանսգենային սերմեր արտադրող Monsanto ընկերությանը, որը մշակում է թույներ, հայտնի ռոք-երաժիշտ Սերժ Թանկյանն անվանել է վտանգավոր։
Ֆեյսբուքի իր էջում նա նշել է՝ ապացույցներ կան, որ այդ ընկերությունը վտանգավոր նյութեր է արտադրում։
«Կան ապացույցներ, որ այդ ընկերության սփրեյները թունավորել են շրջակա միջավայրը՝ նպաստելով մեղուների ոչնչացմանը: Նրանց պատրաստած գենետիկորեն մոդիֆիկացված մթերքը գուժում է օրգանիկ սննդի վերջի մասին: Դրանք վտանգավոր են ու ահավոր հոտ ունեն»,-ֆեյսբուքյան իր էջում գրել է երաժիշտը:
Նրա խոսքով՝ ԱՄՆ-ում և Եվրոպայում Monsanto-ն համարվում է չարիքի ընկերություն:
Թանկյանը նշել է, որ նա Հայաստան գալիս մաքուր, իրական խնձոր է ուտում, որը հազարավոր տարիների գյուղատնտեսության ու մշակման արդյունք է:
Երաժիշտը կոչ է արել հեռու մնալ Monsanto ընկերությունից։
Օրեր առաջ Հայաստանում ԱՄՆ դեսպանատունը, ՀՀ գյուղատնտեսության նախարարությունը և Էյչ-Էս-Բի-Սի Բանկը կազմակերպել էին գործարար համաժողով, որի նպատակը ոլորտի հայկական ընկերություններին ամերիկյան հայտնի «Վալմոնտ» և Monsanto ընկերությունների փորձի, ապրանքների ու տեխնոլոգիաների ներկայացումն էր ու կապերի ձևավորումը:
