ԵՐԵՎԱՆ, 3 հոկտեմբերի — Sputnik. Հունաստանում ընթացող շախմատի Եվրոպայի թիմային առաջնության վեցերորդ տուրում Հայաստանի հավաքականը 1,5:2,5 հաշվով զիջեց Ադրբեջանի հավաքականին։
Մեր հավաքականի կազմում Լևոն Արոնյանն առաջին խաղատախտակի վրա սպիտակներով առավելության հասավ Շաքրիար Մամեդյարովի նկատմամբ, բայց այս հաղթանակն էլ մեր թիմին հաջողություն չապահովեց:
Ինչպես և սպասվում էր, Հայաստան-Ադրբեջան շախմատային հակամարտությունը շատ լարված անցավ, ու բոլոր պարտիաներն էլ ընթացան չափազանց համառ պայքարում: Մեր թիմի առաջատարը՝ Լևոն Արոնյանը, հիանալի խաղով ևս մեկ անգամ ապացուցեց իր բարձր կարգը` պարտության մատնելով մրցակցի առաջատարին՝ Շաքրիար Մամեդյարովին: Բայց Արոնյանին այս անգամ չկարողացան օգնել թիմակիցները:
Մրցաշարի մեկնարկից վեց տուր է անցել, բայց պարզ է, որ այնքան էլ լավ մարզավիճակում չի գտնվում մեր երկրորդ համարը՝ Սերգեյ Մովսեսյանը: Երկրորդ խաղատախտակի վրա նա սև խաղաքարերով պարտություն կրեց Թիմուր Ռաջաբովից, ընդ որում` սա Մովսեսյանի երրորդ պարտությունն էր անցկացրած վեց պարտիաներում, մյուս երեքում էլ նա ոչ-ոքիներ էր գրանցել:
Երրորդ խաղատախտակի վրա Գաբրիել Սարգսյանը, որը մեր թիմի կազմում մինչ այս հանդիպումը ամենաարդյունավետն էր, ոչ-ոքի խաղաց Արկադի Նայդիշի հետ: Սարգսյանը նախորդ հինգ պարտիաներից երեքում հաղթանակի էր հասել, բայց այս պարտիայում նրա հաղթանակի հասնելու բոլոր փորձերն ապարդյուն էին մրցակցի գրագետ պաշտպանության դեմ:
Չորրորդ խաղատախտակի վրա Հրանտ Մելքումյանը, որը խաղում էր սև խաղաքարերով, ամբողջ պարտիայի ընթացքում ստիպված էր պաշտպանվել: Քաջ գիտակցելով, որ թիմային արդյունքը կախված է իր պարտիայից (մյուս երեք պարտիաներն արդեն ավարտվել էին), հայ շախմատիստը պաշտպանվեց ինչքան հնարավոր էր, բայց ստպված էր ընդունել պարտություւնը::
Հայաստանի կանանց հավաքականը 2,5:1,5 հաշվով հաղթանակի հասավ Հունգարիայի քառյակի նկատմամբ: Էլինա Դանիելյանն ու Մարիա Կուրսովան հաղթեցին, իսկ Լիլիթ Մկրտչյանն ու Մարիա Գասպարյանը կիսեցին միավորը մրցակիցների հետ:
Եվրոպայի թիմային առաջնությունը մեկնարկել է հոկտեմբերի 28-ին և կավարտվի նոյեմբերի 6-ին: Առաջնությունն անցկացվում է Հունաստանում։
