iPhone X-ի վաճառքը Ռուսաստանում մեկնարկում է այսօր։ Apple-ի արտադրանքի երկրպագուները մեկ օր առաջ քնում, զարթնում ու գլուխ են կոտրում խանութների դիմաց գոյացած հերթերում։
Իհարկե, բաղձալի այֆոնը կարելի է պատվիրել նաև համացանցում, բայց այդ դեպքում սարքը տեղ կհասնի դեկտեմբերից ոչ շուտ, այդ պատճառով էլ երկրպագուները վայրկյան առաջ «այֆոնատեր» դառնալու համար պատրաստ են գիշերն անցկացնել խանութի դիմաց։
Անգամ ցուրտը չի խանգարում։ Երիտասարդները փաթաթվում են ծածկոցներով ու զինվում թերմոսներով։
Իսկ ի՞նչ է կատարվում Հայաստանում։ Մենք Apple-ի պաշտոնական խանութ չունենք, և օրիգինալ այֆոններ վաճառվում են տեխնիկայի ընդամենը մի քանի խանութում։ Մի խոսքով, մեզ մոտ խանութի դիմաց գիշերող երիտասարդներ չկան, բայց չի նշանակում, որ Հայաստանում յուրաքանչյուր երկրորդը կամ երրորդը չի երազում այֆոնի մասին։
Ու այդ երազանքը ստիպում է վարկերի գիրկն ընկնել ու, հայաստանյան աշխատավարձները հաշվի առնելով, խելահեղ գումարներ տալ այֆոն ունենալու համար։ Օրինակ` նախորդ մոդելը (iPhone 7) վաճառքի մեկնարկին մեր երկրում 800 դոլար արժեր, այն դեպքում, որ Apple-ի պաշտոնական կայքում սարքը 200 դոլարով էժան էր։
iPhone-ի սպիտակ տուփը սեփական ձեռքերով բացելու համար ոմանք պարտք են վերցնում անգամ հորաքույր-մորաքույրներից ու տատիկներից։ Բայց հարցը միայն վարկերով ու պարտքերով չի ավարտվում։ Դեպքեր են եղել, որ անգամ ավտոմեքենան ու ոսկեղենն են վաճառել այֆոնի համար։
Հայ աղջիկներից ոմանք մեծ զոհողությունների են պատրաստ հարուստ մեկի հետ ծանոթանալու համար, որը կկարողանա թանկարժեք այֆոն նվիրել։
Իհարկե, հաճելի է, երբ ձեռքումդ ժամանակակից, առաջադեմ, բազմաթիվ գործառույթներով հագեցած ու ամենաբրենդային հեռախոսն է, բայց չի կարելի հասնել մի վիճակի, որ գաջեթի համար երիկամդ էլ վաճառես։ Կամ առուն չորացնես, որ այֆոնդ գտնես ջրում, ինչպես վարվել էր գերմանացի դպրոցականը։ Նա ռետինե խողովակով փորձել է ջուրը դատարկել զուգարանում, բայց այֆոնն այդպես էլ չէր գտել։ Փոխարենը տուգանք էր ստացել հասարակական զուգարանը ջրով ողողելու համար։ Մեկ այլ տարօրինակ պատմություն. մի աղջիկ հայտարարել էր, թե պատրաստ է կուսությունը փոխանակել այֆոնի հետ։
Հարց է ծագում. արժե՞ արդյոք ժամանակակից խելահեղ արարքների, զոհողությունների դիմել ու սովամահության հասնել գաջեթի համար…
